റിയാദ് - ക്രിസ്റ്റിയാനൊ റൊണാള്‍ഡൊ കളിക്കുന്ന സൗദി പ്രൊഫഷനല്‍ ലീഗ് ക്ലബ്ബ് അന്നസ്‌റിന്റെ ഫ്രഞ്ചുകാരനായ കോച്ച് റൂഡി ഗാര്‍സിയയെ ചുമതലകളില്‍ നിന്ന് നീക്കി. ഗാര്‍സിയയെ പുറത്താക്കിയെന്ന് വാര്‍ത്തകളുണ്ടായിരുന്നു. എന്നാല്‍ ക്ലബ്ബിന്റെ അഭിഭാഷകന്‍ മുഹമ്മദ് അല്‍ദാവിഷ് വാര്‍ത്ത നിഷേധിച്ചു. ഗാര്‍സിയയുടെ കരാര്‍ അവസാനിപ്പിച്ചിട്ടില്ലെന്നും പരിശീലന ചുമതലകളില്‍ നിന്ന് മാറ്റി നിര്‍ത്തുകയേ ചെയ്തിട്ടുള്ളൂ എന്നും അദ്ദേഹം ട്വിറ്ററില്‍ കുറിച്ചു. ഗാര്‍സിയക്ക് മറ്റെന്തെങ്കിലും ചുമതല നല്‍കുമെന്ന് അല്‍ദാവിഷ് വിശദീകരിച്ചു.
അന്നസ്ര്‍ യൂത്ത് ടീമിന്റെ കോച്ച് ദിങ്കൊ ഡെലിസിച്ചിന് സീനിയര്‍ ടീമിന്റെ താല്‍ക്കാലിക ചുമതല നല്‍കുമെന്നാണ് സൂചന. ഗാര്‍സിയയുടെ കരാര്‍ റദ്ദാക്കിയാല്‍ അന്നസ്ര്‍ വലിയ തുക നഷ്ടപരിഹാരമായി നല്‍കേണ്ടി വരും. അഞ്ച് കോടി റിയാല്‍ ഇതുവഴി ക്ലബ്ബിന് നഷ്ടം സംഭവിക്കുമെന്നാണ് വാര്‍ത്ത. അതിനാലാണ് മറ്റു ചുമതല നല്‍കി കോച്ചിനെ നിലനിര്‍ത്തുന്നതെന്നാണ് റിപ്പോര്‍ട്ട്.
അന്നസ്‌റിന്റെ രണ്ട് കളിക്കാരെ സംബന്ധിച്ച തര്‍ക്കമാണ് ക്ലബ്ബും ഗാര്‍സിയയും തമ്മിലുള്ള ഭിന്നതക്ക് കാരണമെന്ന് സ്‌പോര്‍ട്‌സ് ജേണലിസ്റ്റ് മുഹമ്മദ് അല്‍ഇനസി വെളിപ്പെടുത്തി. സൗദി പ്രൊ ലീഗിലെ ഇരുപത്തിമൂന്നാം റൗണ്ടില്‍ അല്‍ഫൈഹയുമായി അന്നസ്ര്‍ സമനില വഴങ്ങിയ ശേഷം കോച്ച് ചില കളിക്കാരെ പരസ്യമായി വിമര്‍ശിച്ചിരുന്നു. മത്സര ശേഷം എല്ലാ കളിക്കാരെയും ഡ്രസ്സിംഗ് റൂമില്‍ വിളിച്ച ഗാര്‍സിയ രൂക്ഷമായി കളിക്കാരെ കുറ്റപ്പെടുത്തിയിരുന്നു. അബ്ദുറഹമാന്‍ ഗരീബിനെയും സുല്‍ത്താന്‍ അല്‍ഗന്നാമിനെയും പേരെടുത്ത് വിമര്‍ശിച്ചു. അവര്‍ക്കെതിരെ സ്വീകാര്യമല്ലാത്ത രീതിയിലും പ്രൊഫഷനല്‍ രീതികള്‍ക്ക് യോജിക്കാത്ത വിധവുമായിരുന്നു വിമര്‍ശനമെന്ന് അല്‍ഇനസി വെളിപ്പെടുത്തി.
അല്‍ഫൈഹക്കെതിരെ തുടക്കം മുതല്‍ പ്രതിരോധത്തിലാണ് അന്നസ്ര്‍ കളിച്ചത്. അല്‍ഗന്നാമിനെ പിന്‍വലിച്ച് അലി ലജമിയെ ഇറക്കി. ഇതെക്കുറിച്ച് ചോദിച്ചപ്പോള്‍ കോച്ച് പറഞ്ഞത് അല്‍ഹിലാലിനെതിരെ കളിക്കേണ്ട രീതി കളിക്കാരെ പരിശീലിപ്പിക്കുന്നുവെന്നാണ്.
ക്രൊയേഷ്യക്കാരനായ ദിങ്കൊ ഇപ്പോള്‍ അന്നസ്ര്‍ യൂത്ത് ടീമിന്റെ കോച്ചാണ്. ക്രൊയേഷ്യയുടെ അണ്ടര്‍-19, അണ്ടര്‍-20 ടീമുകളെ അദ്ദേഹം നേരത്തെ പരിശീലിപ്പിച്ചിരുന്നു. സ്പാനിഷ് ക്ലബ്ബ് ഡിപോര്‍ടിലൊ അലാവേസിന്റെ യൂത്ത് ടീമിനൊപ്പവും പ്രവര്‍ത്തിച്ചിരുന്നു.
കൂടുതല് വായിക്കുക
ഈ വിഭാഗത്തിൽ പോസ്റ്റ് ചെയ്ത അനുബന്ധ ലേഖനങ്ങൾ അടങ്ങിയിരിക്കുന്നു (Related Nodes field)
