ദോഹ- ഇന്ത്യയുടെ 75-ാം റിപ്പബ്ലിക് ദിനത്തോട് അനുബന്ധിച്ച് ഇന്ത്യൻ എംബസി അനുബന്ധ സംഘടനയായ ഇന്ത്യൻ കമ്യൂണിറ്റി ബെനവലന്റ് ഫോറം (ഐ.സി.ബി.എഫ്) വിവിധ ലേബർ ക്യാമ്പുകളിൽ നിന്നുള്ള തൊഴിലാളികൾക്കായി റിപ്പബ്‌ളിക് ദിനാഘോഷം സംഘടിപ്പിച്ചു. ജനുവരി 25 ന് വൈകിട്ട് തുമാമയിലെ ഐ.സി.ബി.എഫ് കാഞ്ചാണി ഹാളിൽ നടന്ന ആഘോഷങ്ങൾ, ഐ.സി.ബി.എഫിന്റെ ഒരു വർഷം നീണ്ടു നിൽക്കുന്ന 40-ാം വാർഷികാഘോഷങ്ങൾക്കുള്ള തുടക്കം കൂടിയായി.
വിവിധ ലേബർ ക്യാമ്പുകളിൽ നിന്നും പ്രത്യേക ക്ഷണിതാക്കളായെത്തിയ നൂറോളം താഴ്ന്ന വരുമാനക്കാരായ തൊഴിലാളികളായിരുന്നു ആഘോഷ പരിപാടികളുടെ പ്രത്യേക ആകർഷണം. ഇവരിൽ നിന്നും തെരഞ്ഞെടുക്കപ്പെട്ട 40 പേർക്ക് ഐ.സി. ബി.എഫ് മാനേജിംഗ് കമ്മിറ്റി അംഗങ്ങൾ സ്‌പോൺസർ ചെയ്ത സൗജന്യ ഐ.സി.ബി.എഫ് ഇൻഷുറൻസ് പോളിസികൾ ചടങ്ങിൽ നൽകുകയുണ്ടായി.ഐ.സി.ബി.എഫ് കോ-ഓർഡിനേറ്റിംഗ് ഓഫീസറും ഇന്ത്യൻ എംബസിയിലെ ഫസ്റ്റ് സെക്രട്ടറിയുമായ ഡോ. വൈഭവ് തണ്ടാലെ ചടങ്ങിൽ മുഖ്യാതിഥിയായി പങ്കെടുത്തു. ഖത്തറിലെ ഇന്ത്യൻ സമൂഹത്തിൽ കഴിഞ്ഞ 40 വർഷമായി ഐ.സി.ബി.എഫ് നടത്തുന്ന പ്രതിബദ്ധതയുള്ള സേവനങ്ങളിൽ അദ്ദേഹം സന്തോഷം രേഖപ്പെടുത്തി. ഐ.സി.ബി.എഫ് പ്രസിഡന്റ് ഷാനവാസ് ബാവ ചടങ്ങിൽ അധ്യക്ഷനായിരുന്നു. ഇന്ത്യൻ സമൂഹത്തോടുള്ള ഐ.സി.ബി.എഫിന്റെ പ്രതിബദ്ധത ഊന്നിപ്പറഞ്ഞ അദ്ദേഹം, 40-ാം വർഷത്തിൽ വിവിധ മേഖലകളിലായി 40 പരിപാടികൾ സംഘടിപ്പിക്കുന്നതിനുള്ള പദ്ധതിയും പ്രഖ്യാപിച്ചു.
ഇന്ത്യൻ സ്‌പോർട്‌സ് സെന്റർ പ്രസിഡന്റ് ഇ.പി. അബ്ദുൽ റഹ്മാൻ, ഐ.സി.ബി.എഫ് ഉപദേശക സമിതി ചെയർമാൻ സാം ബഷീർ, ഐ.സി.ബി.എഫ് മുൻ പ്രസിഡന്റ് നിലാംഗ്ഷു ഡേ തുടങ്ങിയവർ ആശംസകൾ നേർന്ന് സംസാരിച്ചു.
മറ്റ് അപെക്‌സ് ബോഡി അംഗങ്ങളും, വിവിധ അനുബന്ധ സംഘടനാ പ്രതിനിധികളും, വിവിധ കമ്യൂണിറ്റി നേതാക്കളും, തൊഴിലാളി കളോടൊപ്പം ചടങ്ങിൽ സന്നിഹിതരായിരുന്നു.
ഐ.സി.ബി.എഫ് ജനറൽ സെക്രട്ടറി വർക്കി ബോബൻ സ്വാഗതവും, മത്സ്യത്തൊഴിലാളി ക്ഷേമ വിഭാഗം മേധാവി ശങ്കർ ഗൗഡ് നന്ദിയും പറഞ്ഞു.
ഐ.സി.ബി.എഫ് വൈസ് പ്രസിഡന്റ് ദീപക് ഷെട്ടി, സെക്രട്ടറി മുഹമ്മദ് കുഞ്ഞി, ട്രഷറർ കുൽദീപ് കൗർ, മാനേജിംഗ് കമ്മിറ്റി അംഗങ്ങളായ സെറീന അഹമദ്, സമീർ അഹമ്മദ്, അബ്ദുൽ റഊഫ് കൊണ്ടോട്ടി, കുൽവീന്ദർ സിംഗ് ഹണി, ഉപദേശക സമിതി അംഗങ്ങളായ ഹരീഷ് കാഞ്ചാണി, ടി. രാമശെൽവം തുടങ്ങിയവർ പരിപാടികൾക്ക് നേതൃത്വം നൽകി.
