ന്യൂദല്‍ഹി -സ്പിന്നര്‍ ശുഐബ് ബഷീറിന് വിസ ലഭിക്കാന്‍ വൈകിയതോടെ ഇന്ത്യയിലേക്കുള്ള യാത്ര മാറ്റി വെക്കാന്‍ ഒരുങ്ങിയെന്ന് ഇംഗ്ലണ്ട് ടെസ്റ്റ് ക്രിക്കറ്റ് ടീമിന്റെ നായകന്‍ ബെന്‍ സ്റ്റോക്സ്. ടെസ്റ്റ് ടീമിലെ അരങ്ങേറ്റത്തില്‍ ഇതുപോലൊരു സാഹചര്യം ബഷീറിന് ഉണ്ടായതോടെ ക്യാപ്റ്റനെന്ന നിലയില്‍ തകര്‍ന്നു പോയി. ചെറിയ പയ്യനാണ് അയാള്‍, ഡിസംബര്‍ മധ്യത്തില്‍ ഞങ്ങള്‍ ടീം പ്രഖ്യാപിച്ചിട്ടുണ്ട്. എന്നിട്ടും അവസാന നിമിഷവും വിസ ലഭിച്ചില്ല -സ്റ്റോക്സ് പറഞ്ഞു.
അബുദാബിയിലെ ക്യാമ്പിനിടയിലാണ് വിസ വൈകുന്ന കാര്യം അറിഞ്ഞത്. ബഷീറിന് വിസ ലഭിക്കുന്നതു വരെ ഇന്ത്യന്‍ യാത്ര മാറ്റി വെക്കണമെന്നാണ് ഞാന്‍ ചിന്തിച്ചത്. അത് അല്‍പം കടന്ന പ്രതികരണമാവുമെന്ന് തോന്നി. വിസ പ്രശ്‌നത്തില്‍ പര്യടനം മാറ്റി വെക്കാന്‍ ഞങ്ങള്‍ക്ക് സാധിക്കില്ല. എന്നാല്‍ ഞങ്ങളുടെ പൂര്‍ണ പിന്തുണയുണ്ടെന്ന് ബഷീറിന് അറിയാം -സ്റ്റോക്സ് പറഞ്ഞു.
തീര്‍ച്ചയായും ബഷീറിനോട് അനുകമ്പയുണ്ടെന്ന് ഇന്ത്യന്‍ നായകന്‍ രോഹിത് ശര്‍മ പ്രതികരിച്ചു. എന്നാല്‍ ഞാനിരിക്കുന്നത് വിസ ഓഫീസിലല്ലല്ലോ, അതിനാല്‍ കൂടുതലൊന്നും പറയാനാവില്ല -രോഹിത് പറഞ്ഞു. ഇന്ത്യന്‍ വിദേശ മന്ത്രാലയം പ്രശ്‌നത്തില്‍ ഇതുവരെ പ്രതികരിച്ചിട്ടില്ല.
പാക്കിസ്ഥാനില്‍ നിന്ന് കുടിയേറിയ മാതാപിതാക്കള്‍ക്ക് ഇംഗ്ലണ്ടിലെ സറെയില്‍ ജനിച്ച ബഷീറിന് ഇന്ത്യന്‍ വിസ ഇതുവരെ ലഭിച്ചില്ല. അബുദാബിയില്‍ ക്യാമ്പ് കഴിഞ്ഞാണ് ഇംഗ്ലണ്ട് ടീം ഇന്ത്യയിലേക്ക് തിരിച്ചത്. ഇരുപതുകാരന്‍ അബുദാബിയില്‍ വിസ കാത്ത് കഴിയുകയായിരുന്നു. എന്നാല്‍ ഇംഗ്ലണ്ടിലേക്ക് മടങ്ങി വിസ പ്രശ്‌നം പരിഹരിക്കാനാണ് ബഷീറിന് കിട്ടിയ നിര്‍ദേശം. ലണ്ടനിലെ ഇന്ത്യന്‍ ഹൈക്കമ്മീഷനിലേക്ക് പോകാനാണ് ബഷീറിനോട് പറഞ്ഞിരിക്കുന്നത്.
ഇംഗ്ലണ്ട് പ്രശ്‌നം കേന്ദ്ര സര്‍ക്കാരിനെ അറിയിച്ചിട്ടുണ്ടെന്്‌ന ബ്രിട്ടിഷ് ഗവണ്‍മെന്റ് വക്താവ് വെളിപ്പെടുത്തി. എല്ലാ ബ്രിട്ടിഷ് പൗരന്മാരും മാന്യമായി പരിഗണിക്കപ്പെടേണ്ടതാണെന്ന നിലപാടാണ് സര്‍ക്കാരിനെന്നും വക്താവ് പറഞ്ഞു.
ഇന്ത്യയില്‍ നടന്ന ലോകകപ്പിലും പാക്കിസ്ഥാനികള്‍ക്കും പാക് വംശജര്‍ക്കും ഇന്ത്യന്‍ വിസ ഏറെ വൈകിയിരുന്നു. തുടര്‍ന്ന് പാക്കിസ്ഥാന്‍ ക്രിക്കറ്റ് ബോര്‍ഡ് ഐ.സി.സിക്ക് പരാതി നല്‍കുകയായിരുന്നു. കഴിഞ്ഞ വര്‍ഷം ഓസ്‌ട്രേലിയന്‍ ടീം എത്തിയത് വിസ ലഭിക്കാന്‍ വൈകിയ ഉസ്മാന്‍ ഖ്വാജ ഇല്ലാതെയാണ്.
അബുദാബിയിലെ ക്യാമ്പ് പൂര്‍ത്തിയാക്കി ബാക്കി 14 കളിക്കാരുള്‍പ്പെട്ട ടീം ഒരാഴ്ചയായി ഹൈദരാബാദിലുണ്ട്. അബുദാബിയില്‍ വെച്ചുതന്നെ മധ്യനിര ബാറ്റര്‍ ഹാരി ബ്രൂക്ക് വ്യക്തിപരമായ കാരണങ്ങളാല്‍ നാട്ടിലേക്ക് മടങ്ങിയിരുന്നു. ബ്രൂക്ക് തിരിച്ചുവരില്ല. പകരം ഡാന്‍ ലോറന്‍സിനെ ടീമിലുള്‍പെടുത്തിയിട്ടുണ്ട്. വ്യാഴാഴ്ച ഹൈദരാബാദിലാണ് അഞ്ച് ടെസ്റ്റ് പരമ്പരയിലെ ആദ്യ മത്സരം തുടങ്ങുന്നത്.
ബഷീറിന്റെ വിസാ നടപടികള്‍ എത്രയും പെട്ടെന്ന് പൂര്‍ത്തിയാക്കണമെന്ന് ഇംഗ്ലണ്ട് ക്രിക്കറ്റ് ബോര്‍ഡ് ബി.സി.സി.ഐയോടും കേന്ദ്ര സര്‍ക്കാരിനോടും അഭ്യര്‍ഥിച്ചിരുന്നു. ബഷീര്‍ വൈകാതെ എത്തുമെന്ന് ഇംഗ്ലണ്ട് കോച്ച് ബ്രന്‍ഡന്‍ മക്കല്ലം വിശ്വാസം പ്രകടിപ്പിച്ചിരുന്നു.
ബഷീറിന് വിസ അനുവദിച്ചതായ വാര്‍ത്ത ഏതാനും മണിക്കൂറുകള്‍ക്കകം ലഭിക്കുമെന്ന് ഇംഗ്ലണ്ട് കോച്ച് പറഞ്ഞിരുന്നു. 67 റണ്‍സെന്ന വലിയ ശരാശരിയില്‍ വെറും 10 ഫസ്റ്റ് ക്ലാസ് വിക്കറ്റെടുത്ത അനുഭവപരിചയം മാത്രമുള്ള ഇരുപതുകാരനെ ഇംഗ്ലണ്ട് ടീമിലെടുത്തത് അദ്ഭുതം സൃഷ്ടിച്ചിരുന്നു. ഇംഗ്ലണ്ടിന്റെ രണ്ടാം നിരയായ ഇംഗ്ലണ്ട് ലയണ്‍സിനു വേണ്ടി യു.എ.ഇയില്‍ നടത്തിയ പ്രകടനമാണ് ബഷീറിന് അനുകൂലമായത്. ഉയര്‍ന്ന റിലീസ് പോയന്റും, നല്ല ടേണുമുള്ളത് ഇന്ത്യന്‍ പിച്ചുകളില്‍ ബഷീറിനെ അപകടകാരിയാക്കുമെന്ന് ഇംഗ്ലണ്ട് ടീം മാനേജ്‌മെന്റ് കരുതുന്നു.
