പത്തനംതിട്ട- പത്തനംതിട്ടയില് വയോധികനായ വ്യാപാരിയെ കൊലപ്പെടുത്തിയ സംഭവത്തില് പ്രതികളെന്ന് സംശയിക്കുന്ന മൂന്ന് പേര് പോലീസ് കസ്റ്റഡിയില്. ഇവരെ ചോദ്യം ചെയ്ത് വരികയാണെന്ന് പോലീസ് അറിയിച്ചു. കഴിഞ്ഞ ശനിയാഴ്ച വൈകിട്ട് ആണ് 73 വയസ്സുകാരനായ ജോര്ജ് ഉണ്ണുണ്ണി കൊല്ലപ്പെട്ടത്. വയോധികനെ കൊലപ്പെടുത്തി സ്വര്ണവും പണവും കവര്ന്നിരുന്നു. കൈയും കാലും കൂട്ടിക്കെട്ടി വായില് തുണി തിരുകിയ നിലയില് കടക്കുളളില് ഇദ്ദേഹത്തെ കൊല്ലപ്പെട്ട നിലയില് കണ്ടെത്തുകയായിരുന്നു.
മോഷണത്തിനിടെയുള്ള കൊലപാതകമെന്ന് പോലീസ് സ്ഥിരീകരിച്ചിരുന്നു. കഴുത്ത് ഞെരിച്ച് കൊല്ലാന് ഉപയോഗിച്ച കൈലി മുണ്ടുകളും ഷര്ട്ടും പോലീസ് കണ്ടെടുത്തിരുന്നു. ജോര്ജ് ഉണ്ണുണ്ണിയുടെ കഴുത്തില് കിടന്ന ഒന്പത് പവന്റെ മാലയും കാണാനില്ലായിരുന്നു. കഴുത്ത് ഞെരിച്ച് കൊലപ്പെടുത്തിയതിന്റെ ലക്ഷണങ്ങളായിരുന്നു മൃതദേഹത്തിലുണ്ടായിരുന്നത്. അന്വേഷണത്തിനായി പ്രത്യേക സംഘത്തെ നിയോഗിച്ചിട്ടുണ്ട്. മൈലപ്രയില് ഏറെക്കാലമായി കച്ചവടം നടത്തുന്ന വ്യക്തിയാണ് ജോര്ജ്. സ്റ്റേഷനറി സാധനങ്ങളും മറ്റു വീട്ടുസാധനങ്ങളും പഴങ്ങളും ഉള്പ്പെടെയുള്ളവ വില്ക്കുന്ന കടയിലാണ് സംഭവം.
വായിക്കുക
