ഏഴ് അര്‍ധ ശതകം, ഗ്രൂപ്പ് ഘട്ടത്തിലെ താരം കോലി

ബംഗളൂരു - ഒമ്പത് കളികളില്‍ ഏഴിലും അര്‍ധ ശതകം പിന്നിട്ട വിരാട് കോലി ഗ്രൂപ്പ് ഘട്ടത്തിലെ സൂപ്പര്‍ താരമായി. ഓസ്‌ട്രേലിയക്കെതിരെ -85 (116 പന്തില്‍) അഫ്ഗാനിസ്ഥാനെതിരെ 55 നോട്ടൗട്ട് (56), ബംഗ്ലാദേശിനെതിരെ 103 നോട്ടൗട്ട് (97), ന്യൂസിലാന്റിനെതിരെ 95 (104), ശ്രീലങ്കക്കെതിരെ 88 (94), ദക്ഷിണാഫ്രിക്കക്കെതിരെ 101 നോട്ടൗട്ട് (121), നെതര്‍ലാന്റ്‌സിനെതിരെ 51 (56) എന്നിങ്ങനെയാണ് കോലിയുടെ അര്‍ധ ശതകങ്ങള്‍. ആകെ 594 റണ്‍സെടുത്തു. ദക്ഷിണാഫ്രിക്കയുടെ ക്വിന്റന്‍ ഡികോക്കിനെക്കാള്‍ മൂന്ന് റണ്‍സ് കൂടുതല്‍.
നെതര്‍ലാന്റ്‌സിനെതിരായ ലോകകപ്പ് മത്സരത്തില്‍ ്അര്‍ധ ശതകം പിന്നിട്ടയുടനെ കോലിയെ (56 പന്തില്‍ 51, 6-1, 4-5) റുളോഫ് വാന്‍ഡര്‍മെര്‍വ് ബൗള്‍ഡാക്കി. 36 ഓവറില്‍ മൂന്നിന് 250 റണ്‍സ് പിന്നിട്ട ഇന്ത്യ വന്‍ സ്‌കോറിലേക്ക് കുതിക്കുകയാണ്. 
ഓപണര്‍മാരായ ക്യാപ്റ്റന്‍ രോഹിത് ശര്‍മ (54 പന്തില്‍ 61, 6-2, 4-8), ശുഭ്മന്‍ ഗില്‍ (32 പന്തില്‍ 51, 6-4, 4-3) എന്നിവരും അര്‍ധ സെഞ്ചുറി പിന്നിട്ടയുടനെയാണ് പുറത്തായത്. ശ്രേയസ് അയ്യര്‍ (59 പന്തില്‍ 62 നോട്ടൗട്ട്, 4-7) സെഞ്ചുറിയിലേക്ക് നീങ്ങുകയാണ്. 
ടോസ് നേടിയ ആതിഥേയര്‍ ബാറ്റിംഗ് തെരഞ്ഞെടുക്കുകയായിരുന്നു. നേരത്തെ സൂചന നല്‍കിയതു പോലെ കോച്ച് രാഹുല്‍ ദ്രാവിഡ് ഫസ്റ്റ് ഇലവനെ തന്നെയാണ് നെതര്‍ലാന്റ്‌സിനെതിരായ അപ്രസക്ത മത്സരത്തില്‍ ഇറക്കിയത്. 
ശുഭ്മാന്‍ ഗില്ലും രോഹിത് ശര്‍മയും മത്സരിച്ചടിച്ചതോടെ പത്തോവറില്‍ ഇന്ത്യ വിക്കറ്റ് പോവാതെ 91 റണ്‍സെടുത്തു.