വിവാദങ്ങള്ക്ക് വിട, മുഖ്യാതിഥി മോഹന്ലാല് തന്നെ. സംസ്ഥാന ചലച്ചിത്ര അവാര്ഡ് വിതരണം ആഗസ്റ്റ് എട്ടിന് വൈകിട്ട് ആറിന് നിശാഗന്ധിയില് നടക്കും. മലയാള ചലച്ചിത്ര മേഖലയ്ക്ക് നല്കിയ സമഗ്ര സംഭാവനയ്ക്കുള്ള ജെ.സി.ഡാനിയല് പുരസ്കാരവും അവാര്ഡുകളും മുഖ്യമന്ത്രി പിണറായി വിജയന് സമ്മാനിക്കും. സാംസ്കാരിക വകുപ്പ് മന്ത്രി എ.കെ. ബാലന് അധ്യക്ഷത വഹിക്കും. നടന് ഡോ. മോഹന്ലാല് മുഖ്യാതിഥിയായി പങ്കെടുക്കും. പ്രതിപക്ഷ നേതാവ് രമേശ് ചെന്നിത്തല, മന്ത്രിമാരായ ഇ.ചന്ദ്രശേഖരന്, മാത്യു ടി. തോമസ്, എ.കെ.ശശീന്ദ്രന്, രാമചന്ദ്രന് കടന്നപ്പള്ളി, മേയര് വി.കെ. പ്രശാന്ത്, കെ.ടി.ഡി.സി ചെയര്മാന് എം.വിജയകുമാര്, സാംസ്കാരിക വകുപ്പ് സെക്രട്ടറി റാണി ജോര്ജ് എന്നിവരും ചടങ്ങില് സംബന്ധിക്കും. മലയാള സിനിമക്ക് നല്കിയ സമഗ്ര സംഭാവനകള് പരിഗണിച്ച് കേരള സര്ക്കാരിന്റെ പരമോന്നത ചലച്ചിത്ര പുരസ്കാരമായ ജെ.സി. ഡാനിയല് അവാര്ഡ് ശ്രീകുമാരന് തമ്പിക്കാണ് സമ്മാനിക്കുന്നത്. അഞ്ചു ലക്ഷം രൂപയും ശില്പവും പ്രശസ്തിപത്രവും അടങ്ങുന്നതാണ് അവാര്ഡ്.