ബംഗളുരു- ഇന്ത്യന്‍ ബഹിരാകാശ ഗവേഷണ ഏജന്‍സി ഇനി ചന്ദ്രയാന്‍ നാലിലേക്ക്. ബുധനാഴ്ച വിജയകരമായി ചന്ദ്രനില്‍ ഇറക്കിയ ചാന്ദ്രയാന്‍ പേടകം അടുത്ത 14 ദിവസത്തേക്ക് സജീവമായി ഇവിടെ പര്യവേക്ഷണം നടത്തുന്ന ഒരു റോവറും വിന്യസിച്ചു. ചന്ദ്രയാന്‍-4 വിജയകരമായി നടപ്പാക്കുന്നതിന് ജപ്പാനുമായി സഹകരിക്കും.
ഇന്ത്യന്‍ സ്‌പേസ് റിസര്‍ച്ച് ഓര്‍ഗനൈസേഷനും ജപ്പാന്‍ എയ്‌റോസ്‌പേസ് എക്‌സ്‌പ്ലോറേഷന്‍ ഏജന്‍സിയും ചേര്‍ന്ന് ചന്ദ്രധ്രുവ പര്യവേക്ഷണ ദൗത്യം വിക്ഷേപിക്കും. ഇത് ചന്ദ്രയാന്‍-4 എന്നും അറിയപ്പെടും. ചന്ദ്രനില്‍ ജല സാന്നിധ്യമുണ്ടോ എന്നാണ് ഈ ദൗത്യത്തിലൂടെ കണ്ടെത്താന്‍ ശ്രമിക്കുന്നത്.
സമീപ വര്‍ഷങ്ങളില്‍ ലഭ്യമായ നിരീക്ഷണ ഡാറ്റയില്‍ നിന്ന് ചന്ദ്രനില്‍ ജലത്തിന്റെ സൂചനകള്‍ കണ്ടെത്തിയിരുന്നു. ലൂപെക്‌സിന്റെ പ്രാഥമിക ലക്ഷ്യം ചന്ദ്രധ്രുവ പ്രദേശത്തുള്ള ജലത്തിന്റെ സാന്നിധ്യത്തിനും ഉപയോഗക്ഷമതയ്ക്കും വേണ്ടി അന്വേഷിക്കുക എന്നതാണ്. രണ്ട് അടിസ്ഥാന വഴികളിലൂടെ ഈ ലക്ഷ്യം കൈവരിക്കാന്‍ ദൗത്യം ലക്ഷ്യമിടുന്നു: ചാന്ദ്ര ജലസ്രോതസ്സുകളുടെ അളവും ഗുണനിലവാരവും നിര്‍ണ്ണയിക്കുക എന്നതാണത്.
നിലവിലുള്ള നിരീക്ഷണ ഡേറ്റയെ അടിസ്ഥാനമാക്കി ഈ പ്രദേശങ്ങളില്‍ നിലവിലുള്ള ജലത്തിന്റെ യഥാര്‍ഥ അളവ് കണ്ടെത്താനാണ് ഒന്നാമത്തെ രീതിയിലൂടെ ശ്രമിക്കുന്നത്.
