മുംബൈ-ബോളിവുഡ് ബിഗ് ബി അമിതാഭ് ബച്ചന്‍ അഭിനയത്തിനുപുറമേ മറ്റൊരു കാര്യത്തിലും വളരെ പ്രശസ്താണ്. എവിടെയും കൃത്യസമയത്ത് എത്തുക എന്നത്. കൃത്യനിഷ്ഠതയല്ലാതിരിക്കുകയെന്നത് വെറുക്കുന്ന താരം അടുത്തിടെ ട്രാഫിക്കില്‍പെട്ടു. ലൊക്കേഷനിലെത്താന്‍ വൈകുമെന്ന് മനസിലാക്കിയ ബച്ചന്‍ പിന്നെ ചെയ്ത കാര്യവും അതിനുശേഷം അദ്ദേഹം പങ്കുവച്ച പോസ്റ്റും ഏറെ ശ്രദ്ധനേടുകയാണ്.ട്രാഫിക്കില്‍ കുരുങ്ങിയ ബച്ചന്‍ ഒരു വഴിയാത്രക്കാരന്റെ ബൈക്കില്‍ ലിഫ്റ്റ് ചോദിച്ച് പോവുകയും ലൊക്കേഷനില്‍ കൃത്യസമയത്ത് എത്തുകയും ചെയ്തു. ബൈക്കുകാരന്റെ തോളില്‍ കൈവച്ച് കറുത്ത ടീഷര്‍ട്ടും, നീല പാന്റ്സും ബ്രൗണ്‍ കോട്ടും വെള്ള ഷൂസും അണിഞ്ഞ് സ്‌റ്റൈലന്‍ ലുക്കില്‍ അദ്ദേഹം ബൈക്കിലിരിക്കുന്ന ചിത്രങ്ങളും വൈറലാവുകയാണ്. ഇന്‍സ്റ്റാഗ്രാമിലാണ് ചിത്രം സഹിതം ബച്ചന്‍ കുറിപ്പ് പങ്കുവച്ചത്. 'യാത്രയ്ക്ക് നന്ദി സുഹൃത്തേ.. നിങ്ങളെ എനിക്കറിയില്ല.. എന്നാല്‍ നിങ്ങള്‍ എന്നെ ജോലി സ്ഥലത്തേക്ക് കൃത്യസമയത്ത് എത്തിച്ചു.. വേഗത്തിലും ഗതാഗതക്കുരുക്കുകള്‍ ഒഴിവാക്കിയും.. തൊപ്പിയും ഷോര്‍ട്ട്‌സും മഞ്ഞ നിറത്തിലുള്ള ടീഷര്‍ട്ടും അണിഞ്ഞിരുന്നയാളോട് നന്ദി പറയുന്നു'- അമിതാഭ് കുറിച്ചു.
അമിതാഭ് ബച്ചന്‍ പങ്കുവച്ച പോസ്റ്റില്‍ ഏറെ വിമര്‍ശനങ്ങളും ഉയരുന്നുണ്ട്. ഹെല്‍മറ്റ് എവിടെയെന്നും ഇരുവരും ഹെല്‍മറ്റ് ധരിച്ചിട്ടില്ലെന്നും കുറേപേര്‍ കുറ്റപ്പെടുത്തി. പബ്‌ളിസിറ്റിയ്ക്കുവേണ്ടി ചെയ്തതാണിതെന്നും ബച്ചന്റെ ഇമേജിന് ചേര്‍ന്നതല്ലെന്നും വേറെ ചിലര്‍ വിമര്‍ശിച്ചു.
