തിരുവനന്തപുരം - ഇന്ത്യന് ഒളിമ്പിക് അസോസിയേഷന് പ്രസിഡന്റ് സ്ഥാനത്തേക്ക് പി.ടി ഉഷ മത്സരിക്കും. നാമനിര്ദേശ പത്രിക നല്കുമെന്ന് പി.ടി ഉഷ ഫെയ്സ്ബുക്ക് കുറിപ്പിലൂടെ അറിയിച്ചു. അത്ലറ്റുകളുടെയും നാഷണല് ഫെഡറേഷനുകളുടെയും പിന്തുണയോടെയാണ് മത്സരിക്കുന്നതെന്നും ഉഷ വ്യക്തമാക്കി.
പ്രസിഡന്റ് ഉള്പ്പെടെയുള്ള എക്സിക്യൂട്ടീവ് കൗണ്സില് അംഗങ്ങളെ തെരഞ്ഞെടുക്കുന്നതിനുള്ള വിജ്ഞാപനം റിട്ടേണിംഗ് ഓഫീസര് പുറപ്പെടുവിച്ചതിന് പിന്നാലെയാണ് മത്സരിക്കുന്ന വിവരം ഫേസ്ബുക്കിലൂടെ അറിയിച്ചത്.
തെരഞ്ഞെടുപ്പ് നടത്താനുള്ള നടപടികള് കഴിഞ്ഞ ബുധനാഴ്ചയാണ് ആരംഭിച്ചത്. ഡിസംബര് 10ന് നടക്കുന്ന തെരഞ്ഞെടുപ്പില് പങ്കെടുക്കാന് ആഗ്രഹിക്കുന്നവര്ക്ക് നവംബര് 25 മുതല് 27 വരെ നേരിട്ട് നാമനിര്ദേശ പത്രിക സമര്പ്പിക്കാം. ഡിസംബര് ഒന്നുമുതല് മൂന്നുവരെ പേര് പിന്വലിക്കാം. നിലവില് രാജ്യസഭാംഗമാണ് പി.ടി ഉഷ.
