ദോഹ- ഫിഫ 2022 ലോകകപ്പ് സ്‌റ്റേഡിയങ്ങളില്‍ പുകയില, പുകവലി പ്രതിരോധ നടപടികള്‍ നടപ്പാക്കും. സുരക്ഷിതവും ആരോഗ്യകരവുമായ ടൂര്‍ണമെന്റ് ഉറപ്പുവരുത്തുന്നതിന്റെ ഭാഗമായി പൊതുജനാരോഗ്യ മന്ത്രാലയം, സുപ്രീം കമ്മിറ്റി ഫോര്‍ ഡെലിവറി ആന്‍ഡ് ലെഗസി, ഫിഫ, ലോകാരോഗ്യ സംഘടന എന്നിവ ഉള്‍പ്പെടുന്ന സ്‌പോര്‍ട്‌സ് ഫോര്‍ ഹെല്‍ത്ത് പാര്‍ട്ണര്‍ഷിപ്പ് ആണ് പുകയില, പുകവലി പ്രതിരോധ നടപടികള്‍ നടപ്പാക്കുമെന്ന് പ്രഖ്യാപിച്ചത്.
ലോകത്തിലെ ഏറ്റവും വലിയ ഫുട്‌ബോള്‍ മാമാങ്കമായ ഫിഫ ലോകകപ്പ് പുകവലി രഹിത അന്തരീക്ഷത്തില്‍ ആരാധകര്‍ക്ക് ആസ്വദിക്കാന്‍ കഴിയുമെന്ന് ഉറപ്പാക്കാന്‍ എട്ട് ലോകകപ്പ് സ്‌റ്റേഡിയങ്ങളിലും പുകയിലയും ഇസിഗരറ്റും നിരോധിക്കുമെന്ന് അധ്കൃതര്‍ വ്യക്തമാക്കി.
എല്ലാവരുടെയും ആരോഗ്യം സംരക്ഷിക്കുന്നതിനും പ്രോത്സാഹിപ്പിക്കുന്നതിനുമായി ഫുട്‌ബോളിന്റെ ശക്തി പ്രയോജനപ്പെടുത്തുന്നതിന് രൂപകല്‍പ്പന ചെയ്തിരിക്കുന്ന പൊതുജനാരോഗ്യ മന്ത്രാലയം, സുപ്രീം കമ്മിറ്റി ഫോര്‍ ഡെലിവറി ആന്‍ഡ് ലെഗസി, ഫിഫ, ലോകാരോഗ്യ സംഘടന എന്നിവ തമ്മിലുള്ള അതുല്യമായ സഹകരണത്തിന്റെ ഭാഗമാണ് ആരാധകര്‍ക്ക് വേദികള്‍ സുരക്ഷിതമാക്കുന്നതിനുള്ള ശക്തമായ നിയന്ത്രണം. ഇത്, ബഹുജന സമ്മേളനങ്ങളില്‍ ആരോഗ്യം സംരക്ഷിക്കുന്നതിനും പ്രോത്സാഹിപ്പിക്കുന്നതിനുമുള്ള ഒരു ബ്ലൂപ്രിന്റ് സൃഷ്ടിക്കും, അത് പിന്നീട് അന്താരാഷ്ട്ര ഒളിമ്പിക് കമ്മിറ്റിയുമായും മറ്റ് കായിക സംഘടനകളുമായും പങ്കിടാം.
ലോകാരോഗ്യ സംഘടനയുടെ അഭിപ്രായത്തില്‍, പുകയില, ലോകം അഭിമുഖീകരിച്ചിട്ടുള്ള ഏറ്റവും വലിയ പൊതുജനാരോഗ്യ ഭീഷണികളിലൊന്നായി തുടരുന്നു, നേരിട്ടുള്ള പുകയില ഉപയോഗത്തില്‍ നിന്ന് പ്രതിവര്‍ഷം 7 ദശലക്ഷം ആളുകള്‍ കൊല്ലപ്പെടുന്നു, കൂടാതെ സെക്കന്‍ഡ് ഹാന്‍ഡ് പുകയുടെ ഫലങ്ങളില്‍ നിന്ന് 1.2 ദശലക്ഷവും. സെക്കന്‍ഡ് ഹാന്‍ഡ് പുകയില്‍ ഏര്‍പ്പെടാതെ ആരാധകര്‍ക്ക് മത്സരം ആസ്വദിക്കാമെന്ന് ഉറപ്പാക്കുക എന്ന ലക്ഷ്യത്തോടെയാണ് ടൂര്‍ണമെന്റ് സംഘാടകര്‍ നടപടികള്‍ സ്വീകരിക്കുന്നത്.
പുകയിലയുടെ ഉപയോഗത്തെ ചെറുക്കാന്‍ ഫിഫ വളരെക്കാലമായി ശ്രമിച്ചുവരികയാണ് . പുകയില വ്യവസായത്തില്‍ നിന്നുള്ള പരസ്യങ്ങള്‍ സ്വീകരിക്കില്ലെന്ന ഉറച്ച നിലപാടുമായാണ് ഫിഫ മുന്നേറുന്നത്.
ഫിഫ ലോകകപ്പ് വേളയില്‍, പുകയിലയില്‍ ഫിഫ ഇവന്റ് പോളിസി നടപ്പിലാക്കുന്നതില്‍ ഫിഫ വോളണ്ടിയര്‍മാരെയും സുരക്ഷാ ജീവനക്കാരെയും പിന്തുണയ്ക്കാന്‍ 80 പുകയില ഇന്‍സ്‌പെക്ടര്‍മാരുടെ ടീമിനെ ഖത്തര്‍ നിയോഗിക്കും. പുകയില ഉപേക്ഷിക്കാന്‍ ശ്രമിക്കുന്നവര്‍ക്ക് ആവശ്യമായ കൗണ്‍സിലിംഗും ഉപദേശനിര്‍ദേശങ്ങളും നല്‍കാനും സംവിധാനമൊരുക്കും.
