വടകര- ഓണക്കാലം ആഘോഷമാക്കാനുള്ള തയാറെടുപ്പിലാണ് ഒടിടി പ്ലാറ്റ്‌ഫോമുകള്‍. തിയറ്ററുകളില്‍ സൂപ്പര്‍ഹിറ്റായി മാറിയ ചാക്കോച്ചന്‍ ചിത്രം 'ന്നാ താന്‍ കേസ് കൊട്' ഉള്‍പ്പടെ നിരവധി സിനിമകളാണ് സെപ്റ്റംബര്‍ ആദ്യ വാരം ഒടിടിയിലൂടെ റിലീസിനെത്തുന്നത്. സെപ്റ്റംബര്‍ എട്ടിന് തിരുവോണ ദിവസം ഡിസ്‌നി പ്ലസ് ഹോട്ട്സ്റ്റാറിലൂടെ ന്നാ താന്‍ കേസ് കൊട് സ്ട്രീം ചെയ്യും. സെപ്റ്റംബര്‍ ഏഴിന് സുരേഷ് ഗോപി ചിത്രം പാപ്പന്‍ സീ5 പ്ലാറ്റ്‌ഫോമിലൂടെ റിലീസിനെത്തുന്നുണ്ട്. ഷറഫുദ്ദീന്‍ നൈല ഉഷ എന്നിവര്‍ കേന്ദ്രകഥാപാത്രമായിയെത്തിയ പ്രിയന്‍ ഓട്ടത്തിലാണ് മനോരമ മാക്‌സ്, സിംപ്ലി സൗത്ത് എന്നീ പ്ലാറ്റ്‌ഫോമുകളിലൂടെ സെപ്റ്റംബര്‍ 2ന് ചിത്രം റിലീസ് ചെയ്തിരുന്നു. ഇന്ത്യയില്‍ മനോരമ മാക്‌സിലൂടെയും ഇന്ത്യക്ക് പുറത്ത് സിംപ്ലി സൗത്തിലൂടെയുമാണ് ചിത്രം സംപ്രേഷണം ചെയ്യുന്നത്. കൂടാതെ ഓണം പ്രീമിയറായി ചിത്രം മഴവില്‍ മനോരമയിലും സംപ്രേഷണം ചെയ്യും. കിച്ച സുദീപിനെ നായകനാക്കി അനൂപ് ഭണ്ഡാരി സംവിധാനം ചെയ്ത ഫാന്റസി ആക്ഷന്‍ വിക്രാന്ത് റോണ മലയാളത്തില്‍ ഡബ്ബ് ചെയ്തുള്ള പതിപ്പ് ഉള്‍പ്പടെ അഞ്ച് ഭാഷകളിലാണ് ചിത്രം സീ5 പ്ലാറ്റ്‌ഫോമില്‍ റിലീസ് ചെയ്തിരിക്കുന്നത്.
ജോണ്‍ എബ്രഹാം നായകനായി ഏറ്റവും ഒടുവില്‍ പ്രദര്‍ശനത്തിന് എത്തിയ ചിത്രമാണ് 'ഏക് വില്ലന്‍ റിട്ടേണ്‍സ്'. അര്‍ജുന്‍ കപൂറും പ്രധാന വേഷത്തില്‍ എത്തിയ ചിത്രം മൊഹിത് സുരി ആണ് സംവിധാനം ചെയ്തത്. ദിഷ പഠാണിയും താര സുതാരിയയുമാണ് നായികമാര്‍. ചിത്രം സെപ്റ്റംബര്‍ 9 ന് നെറ്റ്ഫഌക്‌സില്‍ എത്തും.
