ചോദ്യം: ബിസിനസ് വിസിറ്റ് വിസയിൽ സൗദിയിൽ എത്തിയ ആൾക്ക് ബിസിനസ് വിസിറ്റ് വിസയെ റസിഡൻസ് വിസയാക്കി (ഇഖാമ) മാറ്റാനാവുമോ?
ഉത്തരം: സൗദി അറേബ്യയുടെ എമിഗ്രേഷൻ നിയമപ്രകാരം വിസിറ്റ് വിസയെ റസിഡൻസ് പെർമിറ്റാക്കി (ഇഖാമ) മാറ്റാൻ കഴിയില്ല. കുടുംബ, ബിസിനസ് സന്ദർശന വിസയിലെത്തുന്നവർ അനുവദിക്കപ്പെട്ട സമയം കഴിഞ്ഞാൽ രാജ്യത്തുനിന്നു മടങ്ങുകയാണ് വേണ്ടത്. ഇത്തരം വിസകളെ സ്ഥിരതാമസ വിസയാക്കി മാറ്റുന്നതിന് നിലവിലെ നിയമം അനുസരിച്ച് സാധിക്കില്ല. അതുകൊണ്ട് സന്ദർശകരായി എത്തുന്നവർ നിയമം അനുസരിച്ച് സ്വന്തം രാജ്യത്തേക്ക് നിശ്ചിത സമയത്തിനകം മടങ്ങണം. അതല്ലെങ്കിൽ നിയമനടപടികൾ നേരിടേണ്ടി വരും. (പ്രത്യേക സാഹചര്യത്തിൽ ആഭ്യന്തര മന്ത്രാലയത്തിന് അവരുടെ ചട്ടപ്രകാരം വേണമെങ്കിൽ സന്ദർശന വിസയെ സ്ഥിരം താമസ വിസയാക്കി മാറ്റാം. ഇത് ആഭ്യന്തര മന്ത്രിയുടെ അധികാര പരിധിയിൽ വരുന്ന കാര്യമാണ്).
ചോദ്യം: പുതിയ നിയപ്രകാരം ഇഖാമ മൂന്നു മാസത്തേക്ക് പുതുക്കാമല്ലോ. അങ്ങനെ പുതുക്കുമ്പോൾ ആശ്രിതരായുള്ള കുടുംബാംഗങ്ങളുടെ വിസയും മൂന്നു മാസത്തേക്കാണോ പുതുക്കുക, അതിന് മൂന്നു മാസത്തെ ലെവി അടച്ചാൽ മതിയാകുമോ?
ഉത്തരം: സൗദിയിൽ ജോലി ചെയ്യുന്നവരുടെ ഇഖാമയുടെ കാലാവധി അനുസരിച്ചായിരിക്കും ആശ്രിതരുടെയും ഇഖാമയുടെ കാലാവധി. അപ്പോൾ മൂന്നു മാസത്തേക്കാണ് ഇഖാമ പുതുക്കുന്നതെങ്കിൽ ആശ്രിത വിസയിലുള്ള കുടുംബാംഗങ്ങളുടെയും ഇഖാമ മൂന്നു മാസത്തേക്കായിരിക്കും പുതുക്കാനാവുക. അങ്ങനെ വരുമ്പോൾ ലെവിയായി മൂന്നു മാസത്തെ തുകയാണ് അടക്കേണ്ടത്. ആശ്രിതരായി കഴിയുന്ന ഓരോരുത്തർക്കും നിലവിൽ പ്രതിമാസം 400 റിയാലാണ് ലെവിയായി നൽകേണ്ടത്. എത്ര മാസത്തേക്കാണോ ഇഖാമ പുതുക്കാൻ ഉദ്ദേശിക്കുന്നത് അത്രയും മാസത്തേക്കുള്ള ലെവി ബാങ്ക് വഴി അടച്ച ശേഷമായിരിക്കണം സ്പോൺസർ വഴി ഇവിടെ ജോലി ചെയ്യുന്നവർ ഇഖാമ പുതുക്കേണ്ടത്.
ചോദ്യം: സൗദിൽ കുടുംബ സമേതം താമസിക്കുന്ന ഞങ്ങളിപ്പോൾ അവധിയിൽ നാട്ടിലാണ്. നാട്ടിൽ കഴിയുന്നതിനിടെ ഞങ്ങൾക്ക് ഒരു കുട്ടി ജനിച്ചു. ആ കുട്ടിയെ ഞങ്ങളോടൊപ്പം സൗദിയിലേക്ക് കൊണ്ടുവരുന്നതിന് എന്താണ് നടപടി ? കുട്ടിക്ക് നാട്ടിൽനിന്നു തന്നെ പുതിയ വിസ സമ്പാദിക്കാനാവുമോ ? അതല്ലെങ്കിൽ കുട്ടിയുമായി വിമാനത്താവളത്തിലെത്തുമ്പോൾ പ്രവേശനാനുമതി ലഭിക്കുമോ?
ഉത്തരം: സൗദിയിൽ താമസ രേഖയുള്ളവർക്ക് (ഇഖാമ) നാട്ടിൽവെച്ച് കുട്ടി ജനിച്ചാൽ ആ കുട്ടിക്ക് ആദ്യം പാസ്പോർട്ട് എടുക്കുകയാണ് വേണ്ടത്. അതിനു ശേഷം എവിടെയാണോ ഉള്ളത് അവിടെയുള്ള സൗദി അറേബ്യൻ എംബസിയുമായോ കോൺസുലേറ്റുമായോ ബന്ധപ്പെട്ട് കുട്ടിക്ക് വിസ സമ്പാദിക്കാം. സൗദിയിൽ എത്തിയ ശേഷം അബ്ശിർ വഴി ഫീസ് അടച്ച് കുട്ടിക്ക് ഇഖാമക്ക് അപേക്ഷിക്കാവുന്നതാണ്. അതോടെ നടപടിക്രമങ്ങൾ പൂർത്തിയാവും.
