ദുബായ്- യു.എ.ഇയിൽ ഇനി മുതൽ ബിസിനസ് തുടങ്ങാൻ സ്വദേശികളായ സ്പോൺസർ ആവശ്യമില്ല. വിദേശ പൗരന്മാർക്ക് ബിസിനസിന്റെ 100 ശതമാനം ഉടമസ്ഥാവകാശം അനുവദിച്ച് യു.എ.ഇ സർക്കാർ ഉത്തരവിട്ടു. 2020 ഡിസംബർ 1 മുതൽ പുതിയ നിയമം പ്രാബല്യത്തിൽ വരും. പ്രസിഡന്റ് ഷെയ്ഖ് ഖലീഫ ബിൻ സായിദ് അൽ നഹ്യാനാണ് ഉത്തരവിട്ടത്. 2015 ലെ നിയമ നമ്പർ 2 ഭേദഗതി ചെയ്താണ് പുതിയ നിയമം.
യു.എ.ഇയിൽ ലൈസൻസുള്ളതും രജിസ്റ്റർ ചെയ്തതുമായ കമ്പനികളുടെ 100 ശതമാനം ഉടമസ്ഥാവകാശം വിദേശ പൗരന്മാർക്ക് അനുവദനീയമാണ്. വിദേശനിക്ഷേപങ്ങളെ കൂടുതൽ ആകർഷണീയമാക്കുന്നതിനാണ് പദ്ധതി ലക്ഷ്യമിടുന്നത്. കമ്പനിയുടെ ചെയർമാനായി യു.എ.ഇ പൗരൻ തന്നെ വേണമെന്ന നിബന്ധനയും ഒഴിവാക്കി.
