കൊച്ചി-അവിവാഹിതനായി തുടരുന്നതിനെ കുറിച്ച് തുറന്നു പറഞ്ഞ് നടനും താരസംഘടന അമ്മയുടെ ജനറല് സെക്രട്ടറിയുമായ ഇടവേള ബാബു. ക്രോണിക് ബാച്ചിലര് എന്നാണ് താരം സ്വയം വിശേഷിപ്പിക്കാറുള്ളത്. എന്നാല് 60 വയസ് കഴിഞ്ഞാല് വിവാഹിതനാകണം എന്ന് പറയാറുള്ള ആളാണ് താന് എന്നും നടന് ബാലയുമായുള്ള അഭിമുഖത്തില് ഇടവേള ബാബു പറയുന്നു.
അറുപത് വയസു വരെ ഒറ്റയ്ക്ക് എവിടെയും പോകാം. മറ്റൊരാളുടെ ആവശ്യം വരുമ്പോള് വിവാഹം ചെയ്യുക എന്നാണ് ഇടവേള ബാബു പറയുന്നത്. ബാച്ചിലര് ലൈഫിന്റെ ഗുണങ്ങളെ കുറിച്ചും താരം വ്യക്തമാക്കുന്നുണ്ട്. അവിവാഹിതനായാല് കുറച്ച് നുണ പറഞ്ഞാല് മതി. സുഹൃത്തുക്കള്ക്ക് എട്ടു മണി കഴിഞ്ഞാല് ഭാര്യമാരുടെ കോള് വരും പുറപ്പെട്ടു, അവിടെയെത്തി എന്നൊക്കെ നുണ പറയണം.
ബെഡ് കണ്ടാല് അപ്പോള് തന്നെ താന് ഉറങ്ങും. ഒരു ടെന്ഷനുമില്ല. എന്നാല് പലര്ക്കും ഗുളിക വേണം അല്ലെങ്കില് രണ്ടെണ്ണം സേവിക്കണം. കല്യാണം കഴിച്ചാല് നമ്മള് ചിന്തിക്കാത്ത വശങ്ങള് വരെ കണ്ടെത്തുന്ന ആള് ഉണ്ടായേക്കും. സ്വന്തം പോളിസിയും ലക്ഷ്യവും ഉണ്ടെങ്കില് ബാച്ചിലര് ലൈഫ് നല്ലതാണെന്ന് ബാബു പറയുന്നത്. ഒരു പേന നിലത്തു വീണാല് പോലും എടുത്തു തരാന് ആളില്ലെന്ന് സ്വയം തീരുമാനിക്കണം. വീട്ടില് ചേട്ടന് എവിടെയെങ്കിലും യാത്ര പോകുമ്പോള് ചേട്ടത്തിയമ്മ പാക്ക് ചെയ്തു കൊടുക്കും. തന്റെ കാര്യത്തില് അത് സ്വയം ചെയ്യണം. ഇത് മനസ്സിലാക്കി എന്തൊക്കെ ചെയ്യണമെന്നതിന് സ്വന്തം സിസ്റ്റം വേണം എന്നും ഇടവേള ബാബു പറഞ്ഞു.
