ദുബായ്- ഇന്ത്യയിലേക്കെത്താൻ ആഗ്രഹിക്കുന്ന പ്രവാസികള്‍ക്ക് കൂടുതൽ വിമാനങ്ങൾ അനുവദിക്കണമെന്നാവശ്യപ്പെട്ട് ഇന്ത്യൻ പ്രധാനമന്ത്രി നരേന്ദ്ര മോഡിക്ക് യു.എ.ഇ കെ.എം.സി.സി വീണ്ടും കത്തയച്ചു.
ഇപ്പോഴത്തെ സാഹചര്യത്തിൽ അടിയന്തരമായി നാട്ടിലെത്തേണ്ട അവസ്ഥയിലുള്ളവരെ സഹായിക്കാൻ ദിവസവും ചുരുങ്ങിയത് 25 വിമാനങ്ങളെങ്കിലും സർവീസ് നടത്തേണ്ടതുണ്ടെന്ന് പ്രധാനമന്ത്രിയെ ധരിപ്പിക്കാനാണു ശ്രമം നടത്തിയത്.
ഇപ്രകാരം വിമാന സർവീസുകൾ സാധ്യമായാൽ മുപ്പതിനായിരത്തിലധികം വരുന്ന ഗർഭിണികളും രോഗികളും ഉൾപ്പെടുന്ന പ്രവാസികളെ രണ്ടാഴ്ച കൊണ്ട് നാട്ടിലെത്തിക്കാൻ കഴിയും.
നേവിയുടെ കപ്പലുകൾ ഉപയോഗിച്ചും പ്രവാസികളുടെ മടക്കം എളുപ്പമാക്കണമെന്നും കെ.എം.സി.സി ആവശ്യപ്പെട്ടു. ഈ കാര്യങ്ങളും പ്രവാസികൾ നേരിടുന്ന ഇതര പ്രശ്നങ്ങളും ധരിപ്പിക്കാനായി വിദേശകാര്യമന്ത്രിക്കും കേരള മുഖ്യമന്ത്രിക്കും യു.എ.ഇ കെ.എം.സി.സി കത്തുകളയച്ചു. പ്രവാസി സഹോദരങ്ങൾക്കു കൂടുതൽ ദുരിതാശ്വാസ, സേവന പ്രവർത്തനങ്ങൾ ആസൂത്രണം ചെയ്യുന്നതിന്നു പുറമെയാണ് ഉത്തരവാദപ്പെട്ടവരുടെ കണ്ണു തുറപ്പിക്കാൻ സഹായകമായേക്കും എന്നു പ്രതീക്ഷയിൽ കെ.എം.സി.സി വീണ്ടും വീണ്ടും അടിയന്തര സന്ദേശങ്ങൾ അയക്കുന്നത്.
