ദുബായ്- മേഖലയിലെ സംഘര്ഷത്തെത്തുടര്ന്ന് ഉടന് ദുബായും അബുദാബിയും വിട്ടുപോകണമെന്ന് പാശ്ചാത്യരെ ഉപദേശിക്കുന്ന ഒരു വിഭാഗം മാധ്യമ പ്രവര്ത്തകരോട് പാശ്ചാത്യര് തന്നെ മറുപടി പറയുന്നു. ഇത് വെറും അതിശയോക്തി. അന്താരാഷ്ട്ര മാധ്യമങ്ങളുടെ അതിശയോക്തി”വിശ്വസിക്കരുതെന്ന് യു.എ.ഇയിലെ പാശ്ചാത്യ പ്രവാസികള് വിദേശികളെ ഓര്മിപ്പിക്കുന്നു.
പ്രസിഡന്റ് ഡോണള്ഡ് ട്രംപ് ഉത്തരവിട്ട യു.എസ് ഡ്രോണ് ആക്രമണം ഇറാനിലെ ഉന്നത കമാന്ഡറായ ഖാസിം സുലൈമാനിയെ വധിച്ചതുമുതല് സംഘര്ഷങ്ങള് രൂക്ഷമായിക്കൊണ്ടിരിക്കുകയാണ്. ജനുവരി നാലിന് നടന്ന കൊലപാതകം മുതല് 'മൂന്നാം ലോക മഹായുദ്ധം' ലോകമെമ്പാടും സോഷ്യല് മീഡിയയില് പ്രചാരത്തിലുണ്ട്.
യു.എസ് വ്യോമാക്രമണത്തെത്തുടര്ന്നുണ്ടായ സംഘര്ഷങ്ങള്ക്കിടയില് ഉടന് തന്നെ ദുബായ്, അബുദാബി എന്നിവിടങ്ങളില്നിന്ന് പുറത്തുപോകാന് പാശ്ചാത്യര്ക്ക് മുന്നറിയിപ്പ് നല്കിഎന്ന തലക്കെട്ടുകള് പ്രധാനമായും ബ്രിട്ടീഷ് പത്രങ്ങളില് പ്രത്യക്ഷപ്പെട്ടതോടെ, പാശ്ചാത്യ പ്രവാസികള് ഇത്തരം അഭ്യൂഹങ്ങള് നിരസിക്കാന് ജനങ്ങളോട് ആവശ്യപ്പെട്ടിട്ടുണ്ട്.
ദുബായിലെ ഒരു ബ്രിട്ടീഷ് പ്രവാസി ജോര്ജീന സ്കോട്ട് പറഞ്ഞു: 'ലണ്ടന് വിട്ട് അഞ്ച് വര്ഷമായി ഞാന് യു.എ.ഇയില് താമസിക്കുന്നു, എനിക്ക് എല്ലായ്പ്പോഴും അവിശ്വസനീയമാംവിധം സുരക്ഷിതത്വം അനുഭവപ്പെടുന്നു. സമാധാനപരമായ ക്രമീകരണത്തിന് ദുബായ് പ്രശസ്തമാണ്. അന്താരാഷ്ട്ര മാധ്യമങ്ങളില് ഇത് സാധാരണമാണ്. നിലവിലെ രാഷ്ട്രീയ സാഹചര്യങ്ങളില് എനിക്ക് അപകടസാധ്യതയുണ്ടെന്ന് തോന്നിയാല് ഞാന് രാജ്യം വിടും. പക്ഷേ ഇപ്പോള് ഞാന് പോകുന്നില്ല. താമസക്കാരുടെ സുരക്ഷക്ക് ഇവിടെ വളരെ പ്രാധാന്യമുണ്ട്.
2008 മുതല് ദുബായില് താമസിക്കുന്ന അമേരിക്കന് പ്രവാസി ഏപ്രില് മക്കാബ് പറയുന്നു: യു.എ.ഇയില് താമസിക്കുന്നതാണ് താന് നാട്ടിലേക്ക് മടങ്ങുന്നതിനേക്കാള് കൂടുതല് സുരക്ഷിതം.
നാട്ടിലുള്ള കുടുംബത്തെക്കുറിച്ച് എനിക്ക് കൂടുതല് ആശങ്കയുണ്ട്, അവര് പറഞ്ഞു. 'ഞാന് ഇവിടെക്ക് താമസം മാറിയതിനുശേഷം ആദ്യമായി എന്റെ അച്ഛന് യു.എ.ഇയിലേക്ക് വരാനിരിക്കുകയാണ്. അദ്ദേഹം പിന്മാറില്ലെന്ന് ഞാന് പ്രതീക്ഷിക്കുന്നു. മിഡില് ഈസ്റ്റിനെക്കുറിച്ച് മാധ്യമങ്ങളില് കാണുന്ന കാര്യങ്ങള് വിശ്വസിക്കരുതെന്ന് ഞാന് എപ്പോഴും ആളുകളോട് പറയാറുണ്ട്. ഇവിടെ ശരിക്കും സുരക്ഷിതവും സുഖകരവുമാണ്. ഇവിടം വൈവിധ്യപൂര്ണമാണ്, അത് വീട് പോലെ തോന്നുന്നു. എന്റെ കുട്ടികള്ക്ക് സുരക്ഷിതത്വം തോന്നുന്നു. യു.എ.ഇയില് ഇപ്പോള് യു.എസില് ഉള്ളതിനേക്കാള് കൂടുതല് സുരക്ഷിതത്വം തോന്നുന്നു.'
