പോർട്ട് ഓഫ് സ്പെയിൻ- ഏകദിന പരമ്പരയില്‍ ഏറ്റവും കൂടുതല്‍ തവണ 300 നു മുകളില്‍ റണ്‍സ് നേടിയ റെക്കോർഡ് ഇനി ഇന്ത്യക്ക് സ്വന്തം. വെസ്റ്റ് ഇൻഡീസിനെതിരായ ഏകദിന പരമ്പരയിലെ രണ്ടാമത്തെ മത്സരത്തിൽ 310 റണ്‍സ് നേടിയതോടെയാണ് ഇന്ത്യ ഓസ്ട്രേലിയയുടെ റെക്കോർഡ് തകർത്തത്. 96 മത് തവണയാണ് ഇന്ത്യ 300 നുമുകളില്‍ റണ്‍സ് കരസ്ഥമാക്കിയത്.
മഴമൂലം 43 ഓവറായി ചുരുക്കിയ മത്സരത്തിൽ ആതിഥേയരെ ഇന്ത്യ 105 റൺസിന് പരാജയപ്പെടുത്തി. രഹാനെയുടെ സെഞ്ചുറിയുടെ കരുത്തിൽ ഇന്ത്യ ഉയർത്തിയ 310 റൺസിന്‍റെ കൂറ്റൻ വിജയലക്ഷ്യം പിന്തുടർന്ന വെസ്റ്റ് ഇൻഡീസിന് 205 റൺസ് എടുക്കാനേ സാധിച്ചുള്ളു. അർധ സെഞ്ചുറി നേടിയ ഓപ്പണർ ഷായി ഹോപ് (81) മാത്രമാണ് വെസ്റ്റ് ഇൻഡീസ് നിരയിൽ പൊരുതിയത്. തകർച്ചയോടെയാണ് ആതിഥേയർ ബാറ്റിംഗ് ആരംഭിച്ചത്. ഓപ്പണർ കീറൻ പവലും മൂന്നാമനായെത്തിയ ജാസൺ മുഹമ്മദും റണ്ണൊന്നും എടുക്കാതെ പുറത്തായി. നാല് റൺസിന് രണ്ട് വിക്കറ്റ് നഷ്ടപ്പെട്ട വിൻഡീസിനെ ഹോപും ലെവിസും (21) ചേർന്ന് മുന്നോട്ട് നയിച്ചു. ടീം സ്കോർ 93 ൽ എത്തിയപ്പോഴാണ് ഈ കൂട്ടുകെട്ട് പിരിഞ്ഞത്. ഇതിനു ശേഷം തുടർച്ചയായി വിക്കറ്റ് വീണത് വിൻഡീസിന് ഇന്ത്യയുടെ റൺമല അപ്രാപ്യമാക്കി. റോസ്റ്റൻ ചേസ് (33) മാത്രമാണ് ഹോപിനെ കൂടാതെ മികച്ച് ബാറ്റ് ചെയ്തത്. ചേസ് പുറത്താകാതെ നിന്നു.
