റിയാദ് - വിവിധ പ്രവിശ്യകളിലെ ആശുപത്രികളിലും പോളിക്ലിനിക്കുകളിലും വ്യക്തിപരിചരണ ഉൽപന്നങ്ങൾ വിൽക്കുന്ന സ്ഥാപനങ്ങളിലും ഒരാഴ്ചക്കിടെ സക്കാത്ത്, നികുതി അതോറിറ്റി നടത്തിയ പരിശോധനകളിൽ മൂല്യവർധിത നികുതിയുമായി ബന്ധപ്പെട്ട 260 നിയമ ലംഘനങ്ങൾ കണ്ടെത്തി.
ഒരാഴ്ചക്കിടെ 1,900 ആരോഗ്യ മേഖലാ സ്ഥാപനങ്ങളിലാണ് സക്കാത്ത്, നികുതി അതോറിറ്റി സംഘങ്ങൾ പരിശോധനകൾ നടത്തിയത്. വാറ്റ് സംവിധാനത്തിൽ രജിസ്റ്റർ ചെയ്യാത്ത സ്ഥാപനങ്ങൾ നികുതി ബിൽ ഇഷ്യു ചെയ്യൽ, തെറ്റായ നികുതി നമ്പർ അടങ്ങിയ നികുതി ബിൽ ഇഷ്യു ചെയ്യൽ പോലുള്ള നിയമ ലംഘനങ്ങളാണ് സ്ഥാപനങ്ങളിൽ കണ്ടെത്തിയത്.
തങ്ങൾ ഇടപാടുകൾ നടത്തുന്ന സ്ഥാപനങ്ങൾ മൂല്യവർധിത സംവിധാനത്തിൽ രജിസ്റ്റർ ചെയ്ത സ്ഥാപങ്ങളാണോയെന്ന് അറിയുന്നതിനും നിയമ ലംഘനം നടത്തുന്ന സ്ഥാപനങ്ങളെ കുറിച്ച് അറിയിക്കുന്നതിനും വാറ്റ് ആപ്ലിക്കേഷൻ ഉപയോഗിക്കണമെന്ന് സക്കാത്ത്, നികുതി അതോറിറ്റി ഉപയോക്താക്കളോട് ആവശ്യപ്പെട്ടു. ഈയാവശ്യത്തിന് സക്കാത്ത്, നികുതി അതോറിറ്റിക്കു കീഴിലെ കോൾ സെന്ററിൽ 19993 എന്ന നമ്പറിൽ ബന്ധപ്പെടാവുന്നതാണെന്നും അതോറിറ്റി പറഞ്ഞു.
