ന്യൂദല്ഹി- പൊതുതെരഞ്ഞെടുപ്പ് പ്രഖ്യാപനത്തിന് മുമ്പ് പൗരത്വനിയമ ഭേദഗതി നടപ്പാക്കാന് സജീവ നീക്കവുമായി മുന്നോട്ടുപോകുന്ന കേന്ദ്രം ഇക്കാര്യത്തില് സംസ്ഥാനങ്ങളുടെ എതിര്പ്പ് മറികടക്കാനുള്ള വഴികളും ആരായുന്നു. സി.എ.എ നടപ്പാക്കില്ലെന്ന് കേരളവും, ബംഗാളും ഉള്പ്പടെയുള്ള ചില സംസ്ഥാനങ്ങള് വ്യക്തമാക്കിയിരുന്നു. ഇത് മറികടക്കാനായി പൗരത്വത്തിനായുള്ള നടപടിക്രമങ്ങളെല്ലാം ഓണ്ലൈന് വഴിയാക്കാനാണ് കേന്ദ്ര ആഭ്യന്തര മന്ത്രാലയം തീരുമാനിച്ചിരിക്കുന്നത്. ഇതിനായി പ്രത്യേക പോര്ട്ടല് കേന്ദ്ര ആഭ്യന്തര മന്ത്രാലയം സജ്ജമാക്കും. പൗരത്വത്തിന് അപേക്ഷിക്കുന്നവര് യാത്രാരേഖകളില്ലാതെ ഇന്ത്യയിലെത്തിയ വര്ഷം വ്യക്തമാക്കേണ്ടതുണ്ട്. അപേക്ഷകരില്നിന്ന് രേഖകളൊന്നും ആവശ്യപ്പെടില്ലെന്നും സര്ക്കാര് വൃത്തങ്ങള് വ്യക്തമാക്കി.
പാകിസ്ഥാന്, ബംഗ്ലാദേശ്, അഫ്ഗാനിസ്ഥാന് എന്നീ രാജ്യങ്ങളിലെ 6 ന്യൂനപക്ഷ മതവിഭാഗത്തില്പെട്ടവര്ക്ക് ഇന്ത്യന് പൗരത്വം നല്കുന്നതിനുള്ള നടപടികളാണ് കേന്ദ്രം ആരംഭിച്ചിരിക്കുന്നത്.
2019 ഡിസംബറില് ആണ് പൗരത്വനിയമ ഭേദഗതി ലോക്സഭാ പാസാക്കിയത്. 2020 ജനുവരി 10-ന് നിയമം നിലവില് വന്നുവെങ്കിലും ചട്ടങ്ങള് രൂപീകരിക്കാത്തതിനാല് നടപ്പാക്കിയിരുന്നില്ല.
