ന്യൂദല്ഹി - അയോധ്യയിലെ രാമക്ഷേത്രത്തിന്റെ പ്രതിഷ്ഠാ ദിന ചടങ്ങിലേക്കുള്ള ക്ഷണം കോണ്ഗ്രസ് നേതാവ് സോണിയ ഗാന്ധി സ്വീകരിച്ചെന്ന് മുതിര്ന്ന കോണ്ഗ്രസ് നേതാവ് ദിഗ് വിജയ് സിംഗ് പറഞ്ഞു. സോണിയയോ, അല്ലെങ്കില് പാര്ട്ടിയില് നിന്നുള്ള മറ്റ് നേതാക്കളോ ചടങ്ങില് പങ്കെടുക്കുമെന്നും അദ്ദേഹം അറിയിച്ചു. അയോധ്യ ക്ഷേത്ര ട്രസ്റ്റ് പ്രതിനിധികള് നേരിട്ടെത്തിയാണ് സോണിയ ഗാന്ധിയെ ചടങ്ങിലേക്ക് ക്ഷണിച്ചത്. കോണ്ഗ്രസ് അധ്യക്ഷന് മല്ലികാര്ജ്ജുന് ഖര്ഗെയേയും ട്രസ്റ്റ് പ്രതിനിധികള് നേരിട്ടെത്തി ക്ഷണിച്ചു. മുന് പ്രധാനമന്ത്രി എച്ച് ഡി ദേവഗൗഡ, മുന് രാഷ്ട്രപതി രാംനാഥ് കോവിന്ദ് എന്നിവരെയും പ്രതിനിധി സംഘം സന്ദര്ശിച്ച് രാമക്ഷേത്രത്തിന്റെ ഉദ്ഘാടന ചടങ്ങിലേക്ക് ക്ഷണിച്ചിട്ടുണ്ടെന്നാണ് വിവരം.
