തിരുവനന്തപുരം-ബജറ്റ് എയര്ലൈനായ സലാം എയറിന്റെ മസ്കത്ത്-തിരുവനന്തപുരം സര്വീസ് ജനുവരി മൂന്ന് മുതല് ആരംഭിക്കും. ബുധന്, ഞായര് ദിവസങ്ങളില് മസ്കത്തില് നിന്ന് രാത്രി 10.15ന് പുറപ്പെടുന്ന വിമാനം പുലര്ച്ചെ 3.25ന് തിരുവനന്തപുരത്തെത്തും. ആഴ്ചയില് രണ്ട് സര്വീസുകളായിരിക്കും ഉണ്ടാകുക. ടിക്കറ്റ് ബുക്കിങ് ആരംഭിച്ചിട്ടുണ്ട്. തിരുവനന്തപുരത്ത് നിന്ന് മസ്കത്തിലേക്ക് തിങ്കള്, വ്യാഴം ദിവസങ്ങളിലായിരിക്കും സര്വീസ്. പുലര്ച്ചെ 4.10ന് പുറപ്പെടുന്ന വിമാനം രാവിലെ 6.30ന് മസ്കറ്റിലെത്തും.
അഞ്ച് ഇന്ത്യന് നഗരങ്ങളിലേക്കാണ് സര്വീസുകള് പ്രഖ്യാപിച്ചത്. തിരുവനന്തപുരം, കോഴിക്കോട്, ഹൈദരാബാദ്, ജയ്പൂര്, ലഖ്നൗ എന്നിവിടങ്ങളിലേക്കാണ് വീണ്ടും സര്വീസുകള് ആരംഭിച്ചത്. ഒമാനിലെ സിവില് ഏവിയേഷന് അതോറിറ്റിയുടെ പിന്തുണയും ഒമാന് എയറുമായുള്ള സഹകരണവുമാണ് ഇന്ത്യന് സെക്ടറിലേക്ക് സര്വീസുകള് പുനരാരംഭിക്കാന് സഹായിച്ചതെന്ന് സലാം എയര് പ്രസ്താവനയില് അറിയിച്ചു.
