കൊച്ചി- കരുവന്നൂര്‍ ബാങ്ക് കള്ളപ്പണക്കേസില്‍ മുന്‍ മന്ത്രി എ.സി മൊയ്തീനെതിരെ ശക്തമായ മൊഴി ലഭിച്ചെന്ന് ഇ.ഡി വൃത്തങ്ങള്‍. എ.സി മൊയ്തീന്റെ ബിനാമിയായി പി. സതീഷ് കുമാര്‍ പ്രവര്‍ത്തിച്ചുവെന്നും നേതാക്കളുടെ ബിനാമിയായി സതീഷ് കുമാര്‍ പണം പലിശക്ക് കൊടുത്തുവെന്നും മൊഴിയില്‍ പറയുന്നു. 100 രൂപക്ക് 10 രൂപ പലിശ ഇയാള്‍ ഈടാക്കി. സി.പി.എം നേതാവ് എം.കെ കണ്ണനെതിരെയും മുന്‍ ഡി.ഐ.ജി എസ്. സുരേന്ദ്രനെതിരെയും മൊഴിയുണ്ടെന്ന് ഇ.ഡി പറയുന്നു.
വ്യാപാരി വ്യവസായി സമിതി നേതാവ് ബിന്നി ഇമ്മട്ടിക്കെതിരെയും, റിട്ട. പോലീസ് ഉദ്യോഗസ്ഥര്‍ക്കെതിരെയും മൊഴിയുണ്ട്. മൊഴിഭാഗങ്ങള്‍ കോടതിയില്‍ വായിച്ചു. മുന്‍ ഡി.ഐ.ജി എസ്. സുരേന്ദ്രന്‍ വസ്തു തര്‍ക്കത്തില്‍ ഇടനിലക്കാരന്‍ ആയി പണം കൈപ്പറ്റിയെന്നാണ് ആരോപണം. സതീഷ് കുമാറിന് വേണ്ടിയാണ് സുരേന്ദ്രന്‍ മധ്യസ്ഥനായതെന്നും ഇ.ഡി കോടതിയില്‍ വാദിച്ചു.
