സിനിമയില്‍നിന്നും മോഡലിംഗില്‍നിന്നും മൂന്ന് വര്‍ഷത്തെ ഇടവേള എടുത്ത് യുവനടി സാനിയ ഇയ്യപ്പന്‍. യു.കെയിലെ യൂണിവേഴ്‌സിറ്റി ഫോര്‍ ദ് ക്രീയേറ്റീവ് ആര്‍ട്‌സിലെ വിദ്യാര്‍ഥിയായിരിക്കുകയാണ് സാനിയ. തെക്കന്‍ ഇംഗ്ലണ്ടിലെ ആര്‍ട്‌സ് ആന്‍ഡ് ഡിസൈന്‍ യൂണിവേഴ്‌സിറ്റിയാണിത്.
സെപ്റ്റംബറില്‍ കോഴ്‌സിന് ചേര്‍ന്ന താരം ബിഎ (ഓണേഴ്‌സ്) ആക്ടിങ് ആന്‍ഡ് പെര്‍ഫോമന്‍സ് എന്ന വിഷയമാണ് പഠിക്കുന്നത്. സാനിയ തന്നെയാണ് സര്‍വകലാശാല ഐഡി കാര്‍ഡ് സമൂഹമാധ്യമങ്ങളില്‍ പങ്കുവച്ച് ഇക്കാര്യം പ്രേക്ഷകരെ അറിയിച്ചത്. ലണ്ടനില്‍നിന്നുള്ള തന്റെ ചിത്രങ്ങളും ഇതിനൊപ്പം താരം പങ്കുവച്ചു. 2026 ജൂണ്‍ വരെയാണ് കോഴ്‌സ്.
ഒഴിവുസമയത്ത് സിനിമയില്‍ തുടരുമോ എന്ന കാര്യം സാനിയ വ്യക്തമാക്കിയിട്ടില്ല. ചാനല്‍ റിയാലിറ്റി ഷോയിലൂടെ എത്തി സിനിമയില്‍ സജീവമായ സാനിയ മോഡലിംഗിലും ശ്രദ്ധ പതിപ്പിച്ചിരുന്നു. ബാല്യകാല സഖി എന്ന ചിത്രത്തിലൂടെ ബാലതാരമായി എത്തിയ താരം ക്വീന്‍ എന്ന ചിത്രത്തിലൂടെ നായികയായി അരങ്ങേറ്റം കുറിച്ചു. പിന്നീട് പ്രേതം 2, സകലകലാശാല, ദ് പ്രീസ്റ്റ്, സല്യൂട്ട്, സാറ്റര്‍ഡേ നൈറ്റ് തുടങ്ങി നിരവധി ചിത്രങ്ങളില്‍ വേഷമിട്ടു.
ഇരഗുപട്രു എന്ന ചിത്രത്തിലൂടെ തമിഴിലും നായികയായി എത്തി. ഈ മാസം റിലീസ് ചെയ്ത ഈ ചിത്രത്തിലെ സാനിയയുടെ പ്രകടനത്തിന് മികച്ച അഭിപ്രായമാണ് ലഭിക്കുന്നത്.
