ബല്ലിയ- ഉത്തര്‍പ്രദേശില്‍ സുഹൃത്തുക്കളോടൊപ്പം കളിക്കുന്നതിനിടയില്‍ തൂങ്ങിമരണം അഭിനയിച്ച പതിമൂന്നുകാരന് ദാരുണാന്ത്യം. ബല്ലിയയിലെ ഗ്രാമത്തിലാണ് സംഭവമെന്ന് പോലീസ് ഉദ്യോഗസ്ഥന്‍ പറഞ്ഞു.
രസ്ര പോലീസ് സ്‌റ്റേഷന്‍ പരിധിയിലെ മധോപൂര്‍ ഗ്രാമത്തിലാണ് ആനന്ദ് എന്ന പതിമൂന്നുകാരന് മരിച്ചത്. ഇളയ സഹോദരനും മറ്റ് ചില കുട്ടികള്‍ക്കുമൊപ്പം കളിക്കുന്നതിനിടെയാണ് മരണമെന്ന് പോലീസ് പറഞ്ഞു.
കുട്ടികള്‍ കളിക്കുന്നതിനിടെ ആനന്ദും ഇളയ സഹോദരന്‍ ഡേവിഡും തമ്മില്‍ തര്‍ക്കമുണ്ടായതായി രസ്ര സര്‍ക്കിള്‍ ഓഫീസര്‍ മുഹമ്മദ് ഫാഹിം ഖുറേഷി പറഞ്ഞു.
കൂടുതല് വായിക്കുക
ഈ വിഭാഗത്തിൽ പോസ്റ്റ് ചെയ്ത അനുബന്ധ ലേഖനങ്ങൾ അടങ്ങിയിരിക്കുന്നു (Related Nodes field)
തുടര്‍ന്ന് ആനന്ദ് സമീപത്തെ മരത്തില്‍ കയറി. തൂവാലകൊണ്ട് കുരുക്കുണ്ടാക്കുകയായിരുന്നു. കാല്‍ വഴുതി ബാലന്‍സ് നഷ്ടപ്പെട്ടാണ് മരണമെന്നും അദ്ദേഹം കൂട്ടിച്ചേര്‍ത്തു.
കുട്ടികള്‍ ബഹളംവെച്ചതിനെ തുടര്‍ന്ന് ഗ്രാമവാസികള്‍ സ്ഥലത്തെത്തിയെങ്കിലും അപ്പോഴേക്കും ആനന്ദ് മരിച്ചിരുന്നുവെന്ന് ഖുറേഷി പറഞ്ഞു.
അംഹര്‍ പ്രദേശത്തെ സ്വകാര്യ സ്‌കൂളില്‍ അഞ്ചാം ക്ലാസ് വിദ്യാര്‍ത്ഥിയായിരുന്നു ആനന്ദ്. സംഭവസമയത്ത് ആനന്ദിന്റെ മാതാപിതാക്കള്‍ ജോലിക്ക് പോയിരുന്നു.
കുട്ടിയുടെ മൃതദേഹം പോസ്റ്റ്‌മോര്‍ട്ടത്തിന് അയച്ചതായി പോലീസ് അറിയിച്ചു. ആനന്ദിന് രണ്ട് സഹോദരന്മാരും ഒരു സഹോദരിയുമുണ്ടെന്ന് ഗ്രാമത്തലവന്‍ പ്രമോദ് കുമാര്‍ പറഞ്ഞു.
ആനന്ദിന്റെ അച്ഛന്‍ ഛോട്ടേ ലാലും അമ്മ രമാവതി ദേവിയും കൂലിപ്പണി ചെയ്യുന്നവരാണ്. തകരപ്പുരയിലാണ് കുടുംബം താമസിക്കുന്നതെന്നും സാമ്പത്തിക നില പരിതാപകരമാണെന്നും അദ്ദേഹം പറഞ്ഞു.
സംഭവത്തില്‍ രസ്ര എംഎല്‍എ ഉമാ ശങ്കര്‍ സിംഗ് ദുഃഖം രേഖപ്പെടുത്തി. കുട്ടിയുടെ കുടുംബത്തെ ഉടന്‍ കാണുമെന്നും അവര്‍ക്ക് ധനസഹായം നല്‍കുന്നതിനായി പ്രവര്‍ത്തിക്കുമെന്നും സിംഗ് പറഞ്ഞു.
