കുവൈത്ത് സിറ്റി - കുവൈത്ത് ക്രിമിനല്‍ കോടതിക്കു മുന്നില്‍ മയക്കുമരുന്ന് വ്യാപാരിയുടെ വിചിത്രമായ കുറ്റസമ്മതം. അതെ, ഞാന്‍ മയക്കുമരുന്ന് വ്യാപാരിയാണ്. എനിക്ക് വധശിക്ഷയോ ജീവപര്യന്തം ശിക്ഷയോ ആണ് ലഭിക്കുക എന്നറിയാം. പണത്തിന് ആവശ്യമുള്ള യുവാക്കളെ മയക്കുമരുന്ന് കടത്തിന് താന്‍ ചൂഷണം ചെയ്യുകയായിരുന്നു - എന്നാണ് കോടതിക്കു മുന്നില്‍ പ്രതി പറഞ്ഞത്. കുവൈത്ത് ക്രിമിനല്‍ കോടതിയുടെ ചരിത്രത്തില്‍ ആദ്യമായാണ് ഒരു പ്രതി ഈ രീതിയില്‍ കുറ്റസമ്മതം നടത്തുന്നത്. സമുദ്ര മാര്‍ഗം രാജ്യത്തേക്ക്് 50 കിലോ ഹഷീഷ് കടത്തിയ കേസിലാണ് ഇയാളും മറ്റു മൂന്നു പ്രതികളും വിചാരണ നേരിടുന്നത്.
സമുദ്ര മാര്‍ഗം 50 കിലോ ഹഷീഷ് രാജ്യത്തേക്ക്് കടത്തിയതായി കോടതിയില്‍ പ്രതി സമ്മതിച്ചു. ഞാനാണ്് കടല്‍ മാര്‍ഗം മയക്കുമരുന്ന് രാജ്യത്തേക്ക് കൊണ്ടുവന്നത്. വധശിക്ഷയോ ജീവപര്യം തടവോ ആയിരിക്കും കോടതി എനിക്ക് വിധിക്കുക എന്ന കാര്യം എനിക്ക് അറിയാം. എനിക്ക് ഇപ്പോള്‍ 50 വയസ് പ്രായമുണ്ട്. കേസിലെ മറ്റു മൂന്നു പ്രതികള്‍ക്ക് മയക്കുമരുന്ന് കടത്തില്‍ പങ്കില്ല. ഇരുപതില്‍ കൂടുതല്‍ പ്രായമില്ലാത്ത ഇളംപ്രായക്കാരാണ് അവര്‍. ഒരു ചരക്ക് നീക്കം ചെയ്യാനാണ് അവരുമായി താന്‍ ധാരണയിലെത്തിയത്.
ഈ ചരക്ക് എന്താണെന്ന് അവര്‍ക്ക് അറിയില്ലായിരുന്നു. ചരക്കില്‍ മയക്കുമരുന്ന് ഒളിപ്പിച്ച കാര്യവും അവര്‍ക്ക് അറിയില്ലായിരുന്നു. ഒരു രാജ്യത്തിന്റെയും പൗരത്വമില്ലാത്ത ബിദൂന്‍ വിഭാഗത്തില്‍ പെട്ട, തൊഴില്‍രഹിതരായ യുവാക്കള്‍ക്ക് പണത്തിനുള്ള ആവശ്യം താന്‍ ചൂഷണം ചെയ്യുകയായിരുന്നു. ചരക്ക് നീക്കം ചെയ്യാനുള്ള ഓഫര്‍ താന്‍ മുന്നോട്ടുവെച്ചപ്പോള്‍ അതിനകത്ത് എന്താണെന്ന് പോലും ചോദിക്കാതെ ഓഫര്‍ അവര്‍ സ്വീകരിക്കുകയായിരുന്നു. മുമ്പും മയക്കുമരുന്ന് വ്യാപാര കേസില്‍ താന്‍ ജയില്‍ശിക്ഷ അനുഭവിച്ചിട്ടുണ്ട്. ഇത്രയും മാത്രമാണ് കോടതിക്കു മുന്നില്‍ തനിക്ക് വെളിപ്പെടുത്താനുള്ളതെന്നും പ്രതി പറഞ്ഞു.
