ഏറ്റവും പുതിയ മമ്മുട്ടി ചിത്രമായ കണ്ണൂര്‍ സ്‌ക്വാഡ് തിയറ്ററുകളില്‍ നിറഞ്ഞോടുമ്പോള്‍ അതിന്റെ കഥക്ക് ആധാരമായ സംഭവം വീണ്ടും ജനശ്രദ്ധയിലേക്ക്. കാസര്‍കോട്ടെ ധനാഢ്യനായ അബ്ദുല്‍ വഹാബിന്റെ വീട്ടില്‍ കൊള്ളയും കൊലയും നടത്തി നാടുവിട്ട കുറ്റവാളി സംഘത്തെ തേടിയുള്ള മമ്മുട്ടിയുടെ എ.എസ്.ഐ ജോര്‍ജിന്റെ നേതൃത്വത്തിലുള്ള സംഘം നടത്തുന്ന അന്വേഷണമാണ് കണ്ണൂര്‍ സ്‌ക്വാഡ് എന്ന സിനിമയുടെ കഥ. യഥാര്‍ഥത്തില്‍ തന്നെ കണ്ണൂര്‍ സ്‌ക്വാഡ് എന്ന പേരില്‍ പോലീസ് സംഘം നിലവിലുണ്ടായിരുന്നു.
യഥാര്‍ഥത്തില്‍ സംഭവിച്ച ഒരു കുറ്റകൃത്യമാണ് കഥക്കാധാരം. തൃക്കരിപ്പൂരില്‍ ഗള്‍ഫ് സ്വദേശിയായ വ്യവസായിയെ കൊലപ്പെടുത്തിയ രണ്ട് യുവാക്കളുടെ വേട്ടയായിരുന്നു അന്നത്തെ കണ്ണൂര്‍ സ്‌ക്വാഡിന്റെ ഏറ്റവും ആവേശകരമായ ദൗത്യം. പ്രതികളെ പിടികൂടുന്നതുവരെ സംഘം 16 ദിവസങ്ങളിലായി 6,000 കിലോമീറ്ററിലധികം സഞ്ചരിച്ചു.
58 വയസ്സുള്ള എ.ബി അബ്ദുള്‍ സലാം ഹാജി 2013 ഓഗസ്റ്റ് 4 ന് വീട്ടില്‍ കൊല്ലപ്പെട്ടു. നിരീക്ഷണ ക്യാമറകള്‍, റിമോട്ട് നിയന്ത്രിത ഗേറ്റുകള്‍, സെന്‍സര്‍ പ്രവര്‍ത്തിപ്പിക്കുന്ന വാതിലുകള്‍ എന്നിവയുള്‍പ്പെടെ അത്യാധുനിക സുരക്ഷാ സംവിധാനങ്ങളായിരുന്നു വീട്ടില്‍ ഉണ്ടായിരുന്നത്.
ഇവരുടെ വീടിനുള്ളില്‍ കയറിയ സംഘം ഹാജിയെയും ഭാര്യയെയും മക്കളെയും കെട്ടിയിട്ടു. ഹാജിയെ കുത്തിക്കൊലപ്പെടുത്തുന്നതിന് മുമ്പ് അവര്‍ സ്വര്‍ണ്ണാഭരണങ്ങള്‍ നല്‍കാന്‍ നിര്‍ബന്ധിച്ചു. അക്രമികള്‍ ഹിന്ദിയിലാണ് സംസാരിച്ചതെന്ന് ബന്ധു പറഞ്ഞു.
നിരീക്ഷണ കാമറകള്‍ പോലും നശിപ്പിച്ച് കൊള്ള ആസൂത്രണം ചെയ്യുന്നതില്‍ അവര്‍ അതീവ ശ്രദ്ധാലുവായിരുന്നു. എന്നിട്ടും അവരില്‍ ഒരാള്‍ കയ്യുറ ഉപേക്ഷിച്ചു. കയ്യുറക്കുള്ളിലെ വിയര്‍പ്പ് ഒരു ഡി.എന്‍.എ സാമ്പിള്‍ നല്‍കി, അത് കോടതിയില്‍ വിലപ്പെട്ട തെളിവായിരുന്നു.
കൊലപാതകത്തിന് തൊട്ടുമുമ്പ് പ്രദേശത്ത് രണ്ട് മൊബൈല്‍ ഫോണ്‍ സിമ്മുകള്‍ പ്രവര്‍ത്തനക്ഷമമാക്കിയതായി അന്വേഷണസംഘം കണ്ടെത്തി. സംഘം സിമ്മുകളുടെ ഉടമകളെ കണ്ടെത്തി. അഞ്ച് പ്രതികളെയാണ് സംഘം പിടികൂടിയത്. ഇരയ്ക്കും കുടുംബത്തിനും പരിചയമുള്ള രണ്ടുപേരാണ് കവര്‍ച്ചയും കൊലപാതകവും ആസൂത്രണം ചെയ്തത്. അന്വേഷണ ഉദ്യോഗസ്ഥരെ തെറ്റിദ്ധരിപ്പിക്കാന്‍ ഓപ്പറേഷന്‍ സമയത്ത് അവര്‍ ഹിന്ദിയില്‍ സംസാരിച്ചു.
സലാം ഹാജി കേസ് അന്വേഷിച്ച പോലീസ് സംഘം
പ്രതികളായ അസ്ഗറും ഷിഹാബും ഉത്തര്‍പ്രദേശിലെ കാണ്‍പൂരിലേക്ക് പലായനം ചെയ്തു. ഒരു സുഹൃത്താണ് അവരെ സഹായിച്ചത്. സ്‌ക്വാഡ് കാണ്‍പൂരിലേക്ക് അവരെ പിന്തുടര്‍ന്നെങ്കിലും ഇരുവരും മൊബൈല്‍ ഫോണ്‍ മാറ്റി ലാന്‍ഡ് ഫോണുകള്‍ ഉപയോഗിക്കാന്‍ തുടങ്ങി. വിവാഹ ബ്രോക്കര്‍മാരുടെയും കൂലിപ്പണിക്കാരുടെയും വേഷത്തില്‍ പ്രതികള്‍ക്കായി ഉദ്യോഗസ്ഥര്‍ നഗരത്തില്‍ തിരച്ചില്‍ നടത്തി.
തുടര്‍ന്ന് നേപ്പാളിലേക്ക് പോകുന്നതിന് പ്രതികള്‍ അലഹബാദിലേക്ക് പോവുകയായിരുന്നെന്ന് സൂചന ലഭിച്ചു. ഇരുവരും അലഹബാദിലേക്കുള്ള ബസില്‍ കയറുകയായിരുന്നു. പോലീസ് ഉദ്യോഗസ്ഥര്‍ കൃത്യസമയത്ത് അലഹബാദിലേക്കുള്ള അതിവേഗ ട്രെയിനില്‍ കയറി. ഇരുവരും സ്‌റ്റേഷനില്‍ ഇറങ്ങുമ്പോള്‍ അസ്ഗറിനേയും ഷിഹാബിനെയും കാത്ത് പോലീസ് നില്‍ക്കുകയായിരുന്നു.
ഉദ്യോഗസ്ഥര്‍ അരമണിക്കൂര്‍ വൈകിയിരുന്നെങ്കില്‍ പ്രതികള്‍ സുരക്ഷിതമായി നേപ്പാളിലേക്ക് കടക്കുമായിരുന്നു. ഇരുവരെയും അടുത്ത ദിവസം വിമാനത്തില്‍ കേരളത്തിലേക്ക് തിരിച്ചയച്ചു. പോലീസിന്റെ വിവിധ വിഭാഗങ്ങളില്‍ സേവനമനുഷ്ഠിക്കുന്ന കണ്ണൂര്‍ സ്‌ക്വാഡ് ഇപ്പോള്‍ നിലവിലില്ല.
കേരളാ പോലീസില്‍ ധൈര്യശാലികളുടെ പട തന്നെ ഉണ്ട്, എന്നാല്‍ 'കണ്ണൂര്‍ സ്‌ക്വാഡ്' പോലെ ഇതിഹാസങ്ങളൊന്നുമില്ല. കശ്മീരിലെ കൊലക്കളങ്ങള്‍ക്കായി കേരളത്തില്‍ തീവ്രവാദ റിക്രൂട്ട്‌മെന്റിനെക്കുറിച്ച് റിപ്പോര്‍ട്ടുകള്‍ പുറത്തുവന്നപ്പോള്‍ അസ്വസ്ഥമായ സമയത്താണ് ഈ ക്രാക്ക് ടീമിന്റെ ഉത്ഭവം.
ഒരു ദശാബ്ദത്തോളം സംസ്ഥാനത്തിനകത്തും പുറത്തുമുള്ള നിരവധി ക്രിമിനല്‍ സംഘങ്ങളെ സ്‌ക്വാഡ് വേട്ടയാടി. അഡീഷണല്‍ സബ് ഇന്‍സ്‌പെക്ടര്‍ ബേബി ജോര്‍ജിന്റെ നേതൃത്വത്തില്‍ അഡീഷണല്‍ സബ് ഇന്‍സ്‌പെക്ടര്‍ മാത്യു ജോസഫ്, സീനിയര്‍ സിവില്‍ പോലീസ് ഓഫീസര്‍മാരായ റാഫി അഹമ്മദ്, പി വിനോദ് കുമാര്‍, കെ മനോജ് കുമാര്‍, സി കെ രാജശേഖരന്‍, റെജി സ്‌കറിയ, സി സുനില്‍ കുമാര്‍, കെ ജയരാജന്‍ എന്നിവര്‍ അംഗങ്ങളായിരുന്നു.
