അറുപത് വയസ്സ് കഴിഞ്ഞവര് ദിവസവും ഒരു മള്ട്ടിവൈറ്റമിന് ഗുളിക വീതം കഴിക്കുന്നത് ഓര്മശക്തിയെ മെച്ചപ്പെടുത്തുമെന്ന് പുതിയ പഠനം. അമേരിക്കയിലെ വിവിധ സര്വകലാശാലകളിലെയും ഗവേഷണ കേന്ദ്രങ്ങളിലെയും ശാസ്ത്രജ്ഞര് ചേര്ന്നാണ് പഠനം നടത്തിയത്. ഗവേഷണ ഫലം അമേരിക്കന് ജേണല് ഓഫ് ക്ലിനിക്കല് ന്യൂട്രീഷനില് പ്രസിദ്ധീകരിച്ചു.
60 വയസ്സിന് മുകളില് പ്രായമുള്ള 3500 പേരില് മൂന്നു വര്ഷം കൊണ്ടാണ് ഗവേഷണം നടത്തിയത്. ഇവരില് പകുതി പേര്ക്ക് ദിവസവും ഒരു മള്ട്ടിവൈറ്റമിന് സപ്ലിമെന്റ് വീതവും പകുതി പേര്ക്ക് പ്ലാസെബോയും നല്കി. മൂന്ന് വര്ഷത്തിന് ശേഷം ഇവരുടെ ഹ്രസ്വകാല ഓര്മയെ വിലയിരുത്താനുള്ള പരിശോധന നടത്തി.
മള്ട്ടിവൈറ്റമിന് കഴിച്ച സംഘത്തിന് കഴിക്കാത്ത സംഘത്തെ അപേക്ഷിച്ച് ഓര്മശേഷിയില് നേരിയ പുരോഗതിയുണ്ടായതായി ഗവേഷകര് നിരീക്ഷിച്ചു. പ്രായമാകുമ്പോള് ധാരണശേഷിയില് ഉണ്ടാകുന്ന മങ്ങല് ഇവര്ക്ക് താരതമ്യേന കുറവായിരുന്നതായും റിപ്പോര്ട്ട് പറയുന്നു.
