കൊല്ലം - ക്ഷേത്രത്തിന് മുന്നില് ഭിക്ഷയെടുത്തു ജീവിക്കുന്ന വയോധികന്റെ പണം മോഷ്ടിച്ച കേസില് ജ്വല്ലറിയിലെ സെക്യൂരിറ്റി ജീവനക്കാരന് അറസ്റ്റില്. മുപ്പത് വര്ഷമായി കരുനാഗപ്പള്ളി മഹാദേവ ക്ഷേത്രത്തിന് മുന്നില് ഭിക്ഷാടനം നടത്തുന്ന ചിറയന്കീഴ് സ്വദേശി സുകുമാരന്റെ (75) സമ്പാദ്യം മോഷ്ടിച്ച കേസിലാണ് ജൂവലറി ജീവനക്കാരന് തെക്കുംഭാഗം താഴേത്തൊടിയില് മണിലാലിനെ(55) പോലീസ് അറസ്റ്റ് ചെയ്തത്. സുകുമാരന് പണം ചാക്കിലാക്കിയാണ് സൂക്ഷിച്ചിരുന്നത്. സിസിടിവി ദൃശ്യങ്ങളിലാണ് മണിലാല് പണം മോഷ്ടിക്കുന്നത് തെളിഞ്ഞത്. മോഷ്ടിച്ച പണമടങ്ങിയ ചാക്ക് മണിലാല് രഹസ്യമായി സൂക്ഷിച്ചിരിക്കുകയായിരുന്നു. പോലീസ് ഇത് കണ്ടെടുത്ത് ഉപയോഗ യോഗ്യമായ നോട്ടുകള് എണ്ണിയപ്പോള് 2.15 ലക്ഷം രൂപയുണ്ടായിരുന്നു. കുറേ നോട്ടുകള് ദ്രവിച്ച് പോയതിന്റെ മൂല്യം കണക്കാക്കിയിട്ടില്ല. മൂന്നു പതിറ്റാണ്ടായി ക്ഷേത്രനടയില് ഭിക്ഷയെടുക്കുന്ന സുകുമാരന് തനിക്ക് കിട്ടുന്ന പണം മുഴുവന് ചില്ലറ മാറ്റി നോട്ടാക്കി പ്ലാസ്റ്റിക് കവറിലിട്ട് ചാക്കുകൊണ്ട് മൂടി അത് തലയിണയ്ക്ക് അടിയില് വച്ചാണ് കിടന്നുറങ്ങിയിരുന്നത്. സുകുമാരന്റെ കൈവശമുള്ള ചില്ലറകള് ലോട്ടറിക്കച്ചവടക്കാര് വന്ന് വാങ്ങും. ഇങ്ങനെ കിട്ടുന്ന 500, 100 രൂപ നോട്ടുകള് സ്വരൂപിച്ച് കവറിലാക്കി ചാക്കു കൊണ്ട് കെട്ടി അതില് തല വച്ച് സമീപത്തെ കടത്തിണ്ണയിലായിരുന്നു സുകുമാരന്റെ ഉറക്കം. ഏപ്രില് 26 ന് പുലര്ച്ചെയാണ് പണച്ചാക്ക് നഷ്ടമായത്. നാലു മണിക്ക് പ്രാഥമിക കൃത്യം നിര്വഹിക്കാന് പോയ സമയത്ത് ചാക്ക് മണിലാല് മോഷ്ടിക്കുകയായിരുന്നു. പണം മോഷണം പോയതിന്റെ വിഷമത്തില് മാനസികമായി തകര്ന്ന സുകുമാരനെ ജനമൈത്രി പൊലീസ് മാവേലിക്കരയിലുള്ള വൃദ്ധ സദനത്തിലേക്ക് മാറ്റിയിരുന്നു.
