ചെന്നൈ- വിദ്വേഷ സിനിമയായ ദി കേരള സ്റ്റോറിക്കു പിന്നാലെ തമിഴ്‌നാട്ടില്‍ വിവാദം സൃഷ്ടിച്ച് മറ്റൊരു മുസ്ലിം വിരുദ്ധ ചിത്രമായി ഫര്‍ഹാന. ഒരു മുസ്ലീം സ്ത്രീയെ കേന്ദ്രീകരിച്ചുള്ള ചിത്രം സംസ്ഥാനത്തെ മുസ്ലിം സംഘടനകളുടെ രോഷത്തിന് ഇടയാക്കിയിട്ടുണ്ട്.
സിനിമയെ തീര്‍ത്തും ഇസ്ലാം വിരുദ്ധമാണെന്ന് ഇന്ത്യന്‍ നാഷണല്‍ ലീഗ് (ഐഎന്‍എല്‍) ആരോപിച്ചു. മുസ്ലിം സമുദായത്തെ പ്രത്യേക രീതിയിലാണ് ചിത്രീകരിച്ചിരിക്കുന്നത്. ചിത്രം നിരോധിക്കണമെന്ന് ക്കുകയും ചെയ്തുവെന്ന് ആരോപിച്ചു. ഐഎന്‍എല്‍ നേതാവ് ജെ അബ്ദുള്‍ റഹീം ചെന്നൈ പോലീസ് കമ്മീഷണര്‍ക്ക് പരാതി നല്‍കി.
ബുര്‍ഖ ധരിച്ച് ലോകമെമ്പാടും ലൈംഗികത്തൊഴില്‍ ചെയ്യുന്ന ഒരു മുസ്ലീം സ്ത്രീയെ ചിത്രീകരിക്കുന്നതാണ് സിനിമയുടെ ടീസര്‍. അക്രമാസക്തമായ ഹിന്ദുത്വ രാഷ്ട്രീയം ഇസ്‌ലാമിക സംസ്‌കാരത്തെ അപമാനിക്കുകയാണെന്ന് ഐഎന്‍എല്‍ നേതാവ് പരാതിയില്‍ പറഞ്ഞു.
മുസ്ലിം പ്രതിഷേധം രൂക്ഷമായിരിക്കെ സിനിമയില്‍ 'ഫര്‍ഹാന' എന്ന കഥാപാത്രത്തെ അവതരിപ്പിച്ച നടി ഐശ്വര്യ രാജേഷിന്റെ വീടിന് പുറത്ത് പോലീസിനെ വിന്യസിച്ചിരിക്കയാണെന്ന് പാലീസ് കമ്മീഷണര്‍ ശങ്കര്‍ ജിവാള്‍ പറഞ്ഞു.
'ഫര്‍ഹാന' എന്ന സിനിമ മുസ്ലിം സ്ത്രീകളെ മാത്രമല്ല, രാജ്യത്തെ മുഴുവന്‍ സ്ത്രീ സമൂഹത്തെയും അപമാനിക്കുന്നതാണെന്ന് മുസ്ലിം മുന്നേറ്റ കഴകം നേതാവ് എം എച്ച് ജവാഹിറുള്ള പറഞ്ഞു.
തിരുവാരൂര്‍ ജില്ലയിലെ പഴയ ബസ് സ്റ്റാന്‍ഡിന് സമീപം മുസ്ലിം മുന്നേറ്റ കഴകം പ്രതിഷേധ പ്രകടനം നടത്തി. വന്‍ പ്രതിഷേധത്തെ തുടര്‍ന്ന് തമിഴ്‌നാട്ടില്‍ സിനിമയുടെ പ്രദര്‍ശനം റദ്ദാക്കുന്നതായി ചില തിയേറ്ററുകള്‍ അറിയിച്ചു.
യാഥാസ്ഥിതികനായ പിതാവിനെ ധിക്കരിക്കുകയും കുടുംബ വരുമാനം വര്‍ധിപ്പിക്കുന്നതിനായി ഒരു കോള്‍ സെന്ററില്‍ ജോലി ചെയ്യാന്‍ തുടങ്ങുകയും ചെയ്യുന്ന വിവാഹിതയായ മുസ്ലീം യുവതിയാണ് ഫര്‍ഹാന. മെച്ചപ്പെട്ട പ്രോത്സാഹനങ്ങളോടെ യുവതിയെ ഓഫീസിലെ പുതിയ വകുപ്പിലേക്ക് മാറ്റി. പുതിയ ജോലി ഫോണ്‍ സെക്‌സ് ചാറ്റ് ആണെന്ന് യുവതി മനസ്സിലാക്കിയിരുന്നില്ല. അത്തരമൊരു ജോലി ചെയ്യാന്‍ അവള്‍ ഞെട്ടലിലും അസ്വസ്ഥതയിലും ആയിരുന്നു. എന്നാല്‍ ആത്യന്തികമായി വീട്ടിലെ സാമ്പത്തിക സ്ഥിതി കാരണം അവള്‍ ജോലി ചെയ്യാന്‍ ഇഷ്ടപ്പെടുന്നു. അവിടെ അവളെ വിളിക്കുന്നവരില്‍ ഒരാളുമായി സൗഹൃദം സ്ഥാപിക്കുകയും അവനുമായി ക്രമേണ ബന്ധം വളരുകയും ചെയ്യുന്നു.
സെക്‌സ് ടോക്ക് ചെയ്യാന്‍ സിനിമ ഒരു മുസ്ലിം സ്ത്രീയെ കൊണ്ടുവരുന്നു എന്നതാലാണ് എതിര്‍പ്പിന് പ്രധാന കാരണം.
എന്തുകൊണ്ടാണ് തിരക്കഥാകൃത്ത് തന്റെ കഥയിലേക്ക് ഈ ആംഗിള്‍ കൊണ്ടുവന്നതെന്നാണ് ചോദ്യം. മുസ്ലിമായ എല്ലാത്തിലും തിന്മ കണ്ടെത്തുന്ന വ്യക്തിയുടെ ആശയമല്ലേ ഇതെന്ന് വിമര്‍ശകര്‍ ചോദിക്കുന്നു. ഇതേ കഥ അയ്യര്‍ സ്ത്രീകളുടെ കാര്യത്തിലും ചെയ്യാമായിരുന്നുവെന്ന് അവര്‍ പറയുന്നു.
ഫര്‍ഹാന ഒരു മതത്തിനോ സമുദായത്തിനോ എതിരല്ലെന്ന് ചിത്രത്തിന്റെ അണിയറപ്രവര്‍ത്തകര്‍ വാര്‍ത്താക്കുറിപ്പ് ഇറക്കി. സിനിമ സര്‍ക്കാര്‍ ശരിയായി സെന്‍സര്‍ ചെയ്തിട്ടുണ്ടെന്നും അവര്‍ പറയുന്നു.
ഡ്രീം വാരിയര്‍ പിക്‌ചേഴ്‌സാണ് ചിത്രത്തിന്റെ നിര്‍മാണം. നെല്‍സണ്‍ വെങ്കിടേശനാണ് സംവിധായകന്‍. ഐശ്വര്യ രാജേഷ്, അനുമോള്‍ തുടങ്ങിയവരാണ് ചിത്രത്തിലെ മറ്റ് താരങ്ങള്‍.
