തിരുവനന്തപുരം- ഷാരോണിനെ ഒഴിവാക്കാന് ഒന്നാം പ്രതി ഗ്രീഷ്മ കഷായത്തില് വിഷം കലര്ത്തി കൊന്നുവെന്ന കുറ്റപത്രം പോലീസ് നെയ്യാറ്റിന്കര സെഷന്സ് കോടതിയില് സമര്പ്പിച്ചു. ഗ്രീഷ്മയുടെ അമ്മ സിന്ധുവിനും അമ്മാവന് നിര്മ്മല് കുമാരന് നായര്ക്കുമെതിരെയും കുറ്റപത്രത്തില് പറയുന്നുണ്ട്. ഇരുവരും ചേര്ന്നാണ് തെളിവ് നശിപ്പിച്ചത്.
ഒക്ടോബറിലാണ് കേസിന് ആസ്പദമായ സംഭവം നടന്നത്. മറ്റൊരാളുമായി വിവാഹം ഉറപ്പിച്ച ഗ്രീഷ്മ നേരത്തെ മുതല് അടുപ്പമുണ്ടായിരുന്ന ഷാരോണിനെ വീട്ടിലേക്ക് വിളിച്ചുവരുത്തി കഷായത്തില് വിഷം കലര്ത്തി നല്കുകയായിരുന്നു. ശാരീരിക അസ്വസ്ഥതകളുണ്ടായതോടെ ആശുപത്രിയില് പ്രവേശിച്ച ഷാരോണ് ചികിത്സയിലായിരിക്കെയാണ് മരിച്ചത്.
കൊലപാതകം, തെളിവ് നശിപ്പിക്കല് എന്നീ കുറ്റങ്ങള്ക്ക് പുറമേ വിഷം നല്കാനായി പ്രലോഭിപ്പിച്ച് ഒരു സ്ഥലത്തേക്ക് വിളിച്ചുവരുത്തുന്നതിന് ഗ്രീഷ്മയ്ക്കെതിരെ 364-ാം വകുപ്പും പോലീസ് ചുമത്തിയിട്ടുണ്ട്.
