പെരിന്തല്മണ്ണ : പെരിന്തല്മണ്ണ തിരഞ്ഞെടുപ്പ് കേസില് കാണാതായ തപാല്വോട്ട് പെട്ടി കണ്ടെത്തി. ജില്ലാ സഹകരണ രജിസ്ട്രാറുടെ മലപ്പുറം ഓഫീസില് നിന്നാണ് തപാല്വോട്ടുപെട്ടി കണ്ടെടുത്തത്. നജീബ് കാന്തപുരം എം എല് എയുടെ വിജയത്തിനെതിരെ എതിര് സ്ഥാനാര്ഥിയായിരുന്ന ഇടത് സ്വതന്ത്രന് കെ പി എം മുസ്തഫ സമര്പ്പിച്ച ഹര്ജിയില് വോട്ടുപെട്ടികള് പരിശോധിക്കാന് തീരുമാനിച്ചിരുന്നു. ഇതിന്റെ അടിസ്ഥാനത്തില് ജില്ലാ ട്രഷറിയില് പരിശോധിച്ചപ്പോഴാണ് വോട്ടുപെട്ടികള് കാണാതിരുന്നത്. തുടര്ന്ന് ഇതു മാധ്യമ വാര്ത്തയായപ്പോള് ജില്ലാ സഹകരണ രജിസ്ട്രാറുടെ മലപ്പുറം ഓഫീസില് പെട്ടികള് ഉണ്ടെന്ന് അറിയിപ്പ് ലഭിക്കുകയായിരുന്നു.
കഴിഞ്ഞ നിയമസഭ തെരഞ്ഞെടുപ്പില് പെരിന്തല്മണ്ണ മണ്ഡലത്തില് വെറും 38 വോട്ടിന്റെ ഭൂരിപക്ഷത്തിനാണ് യു ഡി എഫ് സ്ഥാനാര്ത്ഥി നജീബ് കാന്തപുരം ജയിച്ചത്. അപാകതകള് ചൂണ്ടിക്കാട്ടി 348 സ്പെഷ്യല് തപാല് വോട്ടുകള് എണ്ണിയിരുന്നില്ല. ഉദ്യോഗസ്ഥന് ബാലറ്റ് കവറില് ഒപ്പ് വെച്ചില്ല എന്ന കാരണത്താലാണ് എണ്ണാതിരുന്നത്. ഈ വോട്ടുകള് അസാധുവാക്കിയതിനെതിരെ എതിര് സ്ഥാനാര്ത്ഥി കെ പി എം മുസ്തഫ ഹൈക്കോടതിയെ സമീപിക്കുകയായിരുന്നു.
കൂടുതല് വായിക്കുക
ഈ വിഭാഗത്തിൽ പോസ്റ്റ് ചെയ്ത അനുബന്ധ ലേഖനങ്ങൾ അടങ്ങിയിരിക്കുന്നു (Related Nodes field)
2021ലെ നിയമസഭാ തിരഞ്ഞെടുപ്പില് പെരിന്തല്മണ്ണ മണ്ഡലത്തില് ഉപയോഗിച്ച ബാലറ്റ് പേപ്പര് അടക്കമുള്ള തിരഞ്ഞെടുപ്പ് സാമഗ്രികള് ഇന്നു രാവിലെ ഹൈക്കോടതിയില് എത്തിക്കാന് നിര്ദേശം ലഭിച്ചിരുന്നു. കേസ് നടത്തിപ്പിന്റെ സൗകര്യം കണക്കിലെടുത്ത് ഇവ ഹൈക്കോടതിയിലേക്കു മാറ്റാന് രജിസ്ട്രാര് കഴിഞ്ഞ ദിവസം നിര്ദേശം നല്കിയിരുന്നു. മാറ്റിവെച്ചതും അസാധുവായതും തപാല് ബാലറ്റുകളും മുഴുവനായും, വോട്ടെണ്ണലിന്റെയും അനുബന്ധ പ്രക്രിയകളുടെയും വീഡിയോകളുമാണ് കൊണ്ടുപോകുക. നാളെയാണ് കേസ് വീണ്ടും പരിഗണിക്കുന്നത്.
