മലപ്പുറം- കേരള രാഷ്ട്രീയത്തിലും മുസ്ലിം ലീഗിന്റെ ചരിത്രത്തിലും ഏറെ പ്രധാന്യമുള്ള നേതാവാണ് പാണക്കാട് സയ്യിദ് മുഹമ്മദലി ശിഹാബ് തങ്ങൾ. മുസ്്‌ലിം ലീഗ് സംസ്ഥാന പ്രസിഡന്റായിരിക്കെ മരിച്ച പാണക്കാട് മുഹമ്മദലി ശിഹാബ് തങ്ങൾ ഇപ്പോഴും ഓർമ്മകളിൽ സജീവമാണ്. ശിഹാബ് തങ്ങളുടെ ചിത്രം വേറിട്ട വഴിയിലൂടെ തീർത്തിരിക്കുകയാണ് മലപ്പുറം ജില്ലയിലെ കരുവാരകുണ്ട് കേരള എസ്റ്റേറ്റ് സ്വദേശിയായ ഇല്ലിക്കൽ നിസാം. പുഴയിൽനിന്ന് ശേഖരിച്ച കല്ലുകൾ കൊണ്ടാണ് ചിത്രം തീർത്തിരിക്കുന്നത്. ശിഹാബ് തങ്ങളുടെ സ്മാരകമായി പുതുതായി പണി കഴിച്ച, കരുവാരക്കുണ്ട് പഞ്ചായത്ത് ലീഗ് ഹൗസിന്റെ മുൻ വശത്താണ് കലാകാരനും ഗായകനുമായ നിസാം അതി മനോഹരമായ ഈ സ്റ്റോൺ ആർട്ട് നിർവഹിച്ചിരിക്കുന്നത്. പ്രകൃതി സുന്ദരമായ കരുവാരകുണ്ടിലെ ഒലിപ്പുഴ, കല്ലംപുഴ, വെള്ളിയാർ പുഴ എന്നിവിടങ്ങളിൽ നിന്നും വിവിധ നിറങ്ങളിലുള്ള കല്ലുകൾ ശേഖരിച്ച കല്ലുകൾ ഉപയോഗിച്ച് ആറു ദിവസം കൊണ്ട് ചിത്രം പൂർത്തിയാക്കിയത്.
