റിയാദ് - അഫീഫ്, ദരിയ റോഡിൽ ഓടിക്കൊണ്ടിരുന്ന ബസിൽ തീ പടർന്നുപിടിച്ചു. പിൻവശത്തെ ടയർ പൊട്ടിത്തെറിച്ചാണ് നാൽപതു യാത്രക്കാർ സഞ്ചരിച്ച ബസിൽ തീ പടർന്നുപിടിച്ചത്. സംഭവം ശ്രദ്ധയിൽ പെട്ടയുടൻ യാത്രക്കാർ ചാടിയിറങ്ങിയതിനാൽ വൻ ദുരന്തം ഒഴിവായി. മഴക്കിടെയാണ് ബസിൽ തീ പടർന്നുപിടിച്ചത്. സിവിൽ ഡിഫൻസ് യൂനിറ്റുകൾ ബസിലെ തീയണച്ചു. ആർക്കും പരിക്കില്ലെന്ന് സിവിൽ ഡിഫൻസ് അറിയിച്ചു. ട്രാഫിക് സംഘം ഇടപെട്ട് യാത്രക്കാരെ പിന്നീട് സുരക്ഷിത സ്ഥലത്തേക്ക് മാറ്റുകയും റോഡിൽ ഗതാഗതം ക്രമീകരിക്കുകയും ചെയ്തു.
