കൊല്ലം-നടനും ബിഗ് ബോസ് താരവുമായ ഫിറോസ് ഖാന്റെ നിര്‍മ്മാണത്തിലിരിക്കുന്ന വീട് അടിച്ചു തകര്‍ത്തതായി പരാതി. വീട് നിര്‍മ്മാണത്തിന് കരാറെടുത്ത കോണ്‍ട്രാക്ടറാണ് വീട് അടിച്ചു തകര്‍തെന്നാണ് മുന്‍ ബിഗ് ബോസ് താരങ്ങളായ ഫിറോസ് ഖാനും ഭാര്യ സജ്ജനയും ആരോപിക്കുന്നത്.എന്നാല്‍ ഇവരുടെ ആരോപണം കോണ്‍ട്രാക്ടര്‍ നിഷേധിച്ചു. ഫിറോസ് ഖാന്റേയും സജനയുടേയും കൊല്ലം ചാത്തന്നൂരിലെ വീടിന് നേരെയാണ് ആക്രമണം ഉണ്ടായത്. കഴിഞ്ഞ ദിവസം രാത്രി ഒന്‍പത് മണിയോടെയാണ് സംഭവം. വീടിന്റെ നിര്‍മ്മാണം അവസാന ഘട്ടത്തിലായിരുന്നു.
വീടിന്റെ നിര്‍മ്മാണ കരാര്‍ ഏറ്റെടുത്ത കൊല്ലം സ്വദേശിയായ കോണ്‍ട്രാക്ടര്‍ ഷഹീര്‍ പറഞ്ഞുറപ്പിച്ച തുകയേക്കാള്‍ മൂന്ന് ലക്ഷം രൂപ അധികം ആവശ്യപ്പെട്ടെന്നും ഇതു നല്‍കാതിരുന്നതിലുള്ള പ്രതികാരത്തിന് വീട് അടിച്ചു തകര്‍ക്കുകയായിരുന്നു എന്നാണ് ഫിറോസും സജനയും പറയുന്നത്.സംഭവത്തില്‍ ഫിറോസ് കൊല്ലം ചാത്തനൂര്‍ പോലീസില്‍ പരാതി നല്‍കി. എന്നാല്‍ വീട് അടിച്ചു തകര്‍ത്തുവെന്ന ആരോപണം കോണ്‍ട്രാക്ടറായ ഷഹീന്‍ നിഷേധിച്ചു. വീട് അടിച്ചു തകര്‍ത്തത് സംഭവവുമായി തനിക്ക് യാതൊരു ബന്ധവുമില്ലെന്നും ഷഹീന്‍ പ്രതികരിച്ചു. അതേസമയം, വീട് നിര്‍മാണം തുടങ്ങിയ ശേഷം കരാറുകാര്‍ കൂടുതല്‍ തുക ആവശ്യപ്പെട്ട് പ്രയാസമുണ്ടാക്കാല്‍ പതിവാണെന്നാണ് പ്രദേശ വാസികള്‍ പറയുന്നത്.
