മലപ്പുറം-ഡ്രൈവിംഗ് ടെസ്റ്റിനിടെ യുവതിയോട് മോശമായി പെരുമാറിയെന്ന പരാതിയില് മോട്ടോര് വെഹിക്കിള് ഇന്സ്പെക്ടര്ക്കെതിരെ പോലീസ് കേസെടുത്തു. മലപ്പുറം എം.വി.ഐ സി. ബിജു (50)വിനെതിരെയാണ് മലപ്പുറം വനിതാ പോലീസ് കേസെടുത്തത്. മലപ്പുറം ആര്.ടി.ഒയുടെ കീഴില് നടന്ന ഡ്രൈവിംഗ് ടെസ്റ്റിനിടെ കാറില് വെച്ച് ഉദ്യോഗസ്ഥന്
ലൈംഗിക ഉദ്ദേശ്യത്തോടെ യുവതിയെ അപമാനിക്കാന് ശ്രമിച്ചതായാണ് പരാതി. സംഭവത്തെ തുടര്ന്നു അന്വേഷണ വിധേയമായി ബിജുവിനെ ജോലിയില് നിന്നു ട്രാന്സ്പോര്ട്ട് കമ്മീഷണര് സസ്പെന്ഡ് ചെയ്തതായി അറിയിച്ചു. സംഭവത്തില് പ്രതിയായ ഉദ്യോഗസ്ഥനെതിരെ യുവതിയുടെ പരാതിയില് സ്ത്രീത്വത്തെ അപമാനിച്ചതിന് ഐ.പി.സി 354 (എ) വകുപ്പുകള് പ്രകാരമാണ് കേസെടുത്തത്. പരാതിയില് കേസെടുത്ത് അന്വേഷണം ആരംഭിച്ചതായും പ്രതിക്കായി തെരച്ചില് നടത്തുകയാണെന്നും മലപ്പുറം വനിതാ പോലീസ് പറഞ്ഞു. സംഭവത്തില് യുവതിയും കുടുംബവും ഗതാഗത മന്ത്രിക്കും ആര്ടിഒക്കും പരാതി നല്കിയിട്ടുണ്ട്. ഉദ്യോഗസ്ഥന്റെ മോശം പെരുമാറ്റത്തെക്കുറിച്ച് പരാതി ലഭിച്ചിട്ടുണ്ടെന്നും ഇതുമായി ബന്ധപ്പെട്ട ഇന്റേണല് റിപ്പോര്ട്ട് ട്രന്സ്പോര്ട്ട് കമ്മീഷണര്ക്കു കൈമാറിയെന്നും മലപ്പുറം ആര്.ടി.ഒ സി.വി.എം ഷരീഫ് പ്രതികരിച്ചു. പ്രതിയായ ഉദ്യോഗസ്ഥന് നിലവില് ജോലിക്ക് വരുന്നില്ലെന്നും ആര്ടിഒ അറിയിച്ചു.
