- ആഭരണങ്ങളെല്ലാം റൂമിൽ ഊരി വെച്ച്, മൊബൈൽ ഫോൺ എടുക്കാതെയാണ് യുവതി വീട് വിട്ടത്.
പത്തനംതിട്ട - നാടുവിടുകയാണെന്ന കത്തെഴുതി വെച്ച് വീട്ടിൽ നിന്നിറങ്ങിയ യുവതിയുടെ സ്‌കൂട്ടർ നദിയ്ക്കു മുകളിലെ പാലത്തിൽ. സി.എ വിദ്യാർത്ഥിനി പത്തനംതിട്ട തെങ്ങുംകാവ് കാഞ്ഞിരവിള ആതിര(20)യുടെ സ്‌കൂട്ടറാണ് പ്രമാടം പാറക്കടവിൽ അച്ചൻകോവിൽ ആറിന്റെ പാലത്തിൽ കണ്ടെത്തിയത്.
എന്നാൽ യുവതി എവിടെയാണെന്ന് കണ്ടെത്താനായില്ല. ആറ്റിൽ ചാടിയോ? നാടു വിട്ടോ? അതോ മറ്റു വല്ലതും സംഭവിച്ചോ? തുടങ്ങി
ദുരൂഹതകളിൽ കഴിയുകയാണ് നാട്ടുകാരും കുടുംബങ്ങളും.
ആറ്റിൽ ചാടിയിരിക്കാമെന്ന നിഗമനത്തിൽ പോലീസും പത്തനംതിട്ട ഫയർ ഫോഴ്‌സും തെരച്ചിൽ ആരംഭിച്ചെങ്കിലും ഇതുവരെയും തെളിവുകളൊന്നും ലഭിച്ചിട്ടില്ല. വെള്ളിയാഴ്ച പുലർച്ചെ നാലു മുതലാണ് യുവതിയെ കണാതായതെന്നാണ് വീട്ടുകാർ പറയുന്നത്. ആഭരണങ്ങളെല്ലാം മുറിക്കുള്ളിൽ ഊരി വെച്ചാണ് യുവതി വീട് വിട്ടത്. മൊബൈൽഫോണും കൊണ്ടുപോയിട്ടില്ല. താൻ നാട് വിട്ടുപോവുകയാണെന്നും സ്‌കൂട്ടർ പാറക്കടവ് പാലത്തിൽ വയ്ക്കുമെന്നുമാണ് മുറിയിൽ കണ്ടെത്തിയ കത്തിലുള്ളത്.
ഇതേ തുടർന്നാണ് യുവതി ആറ്റിൽ ചാടിയിട്ടുണ്ടാവുമെന്ന സംശയത്തിൽ കോന്നി പോലീസും പത്തനംതിട്ടയിൽനിന്നുള്ള അഗ്‌നിരക്ഷാ സേനയും സംയുക്ത തെരച്ചിൽ ആരംഭിച്ചത്. അതേസമയം, സ്‌കൂട്ടർ പാലത്തിന് സമീപം ഉപേക്ഷിച്ച് മറ്റെവിടെയോ പോകാനുള്ള സാധ്യതയും പോലീസ് പരിശോധിക്കുന്നുണ്ട്. സമീപത്തുള്ള സി.സി.ടി.വി ദൃശ്യങ്ങളടക്കം പരിശോധിച്ചുവരികയാണ്.
