കൊച്ചി-ചെമ്പില്‍ സ്വര്‍ണം പൊതിഞ്ഞ ആഭരണങ്ങള്‍ പണയം വച്ച് ബാങ്കുകളില്‍നിന്ന് ലക്ഷങ്ങള്‍ തട്ടിയ കേസില്‍ നാല് പേര്‍ അറസ്റ്റില്‍. നേര്യമംഗലം പിറക്കുന്നംകര തലക്കോട് എരങ്ങോത്ത് വീട്ടില്‍ എല്‍ദോസ് (57), പുത്തന്‍പുരയില്‍ വീട്ടില്‍ അയ്യപ്പന്‍ (58), തേലയ്ക്കാക്കുടി വീട്ടില്‍ അനൂപ് (40), പള്ളിപ്പറമ്പില്‍ പൗലോസ് (58) എന്നിവരെയാണ് ഊന്നുകല്‍ പോലീസ് അറസ്റ്റ് ചെയ്തത്. ഊന്നുകല്‍ സര്‍വ്വീസ് സഹകരണ ബാങ്ക്, കവളങ്ങാട് സര്‍വ്വീസ് സഹകരണ ബാങ്കിന്റെഹപുത്തന്‍കുരിശ് ബ്രാഞ്ച് എന്നിവിടങ്ങളില്‍ നിന്നാണ് ഇവര്‍ വ്യാജ സ്വര്‍ണം പണയം വെച്ച് പണം തട്ടിയത്.
ഊന്നുകല്‍ ബാങ്കില്‍ വിവിധ സമയങ്ങളിലായി എല്‍ദോസ്, അനൂപ്, അയ്യപ്പന്‍ എന്നിവര്‍ ഏഴര ലക്ഷം രൂപയുടെ ആഭരണങ്ങള്‍ പണയം വച്ചാണ് തട്ടിപ്പ് നടത്തിയത്. തലക്കോട് പുത്തന്‍ കുരിശ് ബ്രാഞ്ചില്‍ എല്‍ദോസ്, പൗലോസ് എന്നിവര്‍ ചേര്‍ന്ന് സ്വര്‍ണം പൊതിഞ്ഞ ആഭരണങ്ങള്‍ പണയം വച്ച് അഞ്ച് ലക്ഷത്തി അറുപത്തിനാലായിരം രൂപയുമാണ് തട്ടിയത്. സംഭവത്തിലെ പ്രധാനി എല്‍ദോസാണെന്ന് പോലീസ് പറഞ്ഞു. ഇന്‍സ്‌പെക്ടര്‍ ഒ.എ.സുനില്‍, എസ്.ഐ കെ.ആര്‍.ശരത്ചന്ദ്രകുമാര്‍, എ.എസ്.ഐ മാരായ പി.എ.സുധീഷ്, ലെയ്‌സണ്‍ ജോസഫ്, എന്‍.ബി.അഷറഫ്, പി.എ.മനാഫ്, എം.എം.ബഷീര്‍, എസ്.സി.പി.ഒ മാരായ എ.പി.ഷിനോജ്, സി.എം.ഷിജു, എം.എന്‍.ജോഷി. കെ.എസ്.ഷനില്‍, പി.എന്‍.ആസാദ് തുടങ്ങിയവരാണ് പ്രതികളെ അറസ്റ്റ് ചെയ്തത്.
