റിയാദ് - തുര്ക്കിയിലെ ഇസ്താംബൂളില് ഹോട്ടല് കെട്ടിടത്തിന്റെ ഒമ്പതാം നിലയില് നിന്ന് വീണ് പരിക്കേറ്റ സൗദി പെണ്കുട്ടിയെ തുടര് ചികിത്സക്കു വേണ്ടി എയര് ആംബുലന്സില് സ്വദേശത്ത് എത്തിച്ചു. ഇസ്താംബൂള് സൗദി കോണ്സുലേറ്റ് മുന്കൈയെടുത്ത് നടപടികള് പൂര്ത്തിയാക്കിയാണ് എയര് ആംബുലന്സില് 14 കാരിയെ സൗദിയിലേക്ക് നീക്കാന് ആവശ്യമായ ക്രമീകരണങ്ങള് ഏര്പ്പെടുത്തിയത്. പെണ്കുട്ടിയെ വിദഗ്ധ ചികിത്സക്കു വേണ്ടി സൗദിയിലെ ആശുപത്രിയിലേക്ക് മാറ്റാന് ഭരണാധികാരികള് നിര്ദേശിക്കുകയായിരുന്നെന്ന് ഇസ്താംബൂള് സൗദി കോണ്സല് ജനറല് അഹ്മദ് അല്ഉഖൈല് പറഞ്ഞു.
സൗദി അറേബ്യയില് നിന്ന് അയച്ച എയര് ആംബുലന്സില് തുര്ക്കിയിലെ സൗദി എംബസി, കോണ്സുലേറ്റ് അംഗങ്ങളുടെ സാന്നിധ്യത്തിലാണ് പെണ്കുട്ടിയെ സൗദിയിലേക്ക് അയച്ചത്. ഒമ്പതാം നിലയിലെ ഫഌറ്റിന്റെ ജനല് വഴി താഴത്തെ കാഴ്ചകള് കാണുന്നതിനിടെ 14 കാരി നിയന്ത്രണം വിട്ട് താഴേക്ക് വീഴുകയായിരുന്നു. ഹോട്ടല് കെട്ടിടത്തിന്റെ മുന്ഭാഗത്ത് ആറാം നിലയിലുള്ള ബീമിനു മുകളിലേക്കാണ് പെണ്കുട്ടി പതിച്ചത്. ഇതാണ് 14 കാരിയുടെ ജീവന് രക്ഷിക്കാന് സഹായിച്ചത്.
