ന്യൂദൽഹി- ഗുജറാത്ത് പോലീസ് ഇന്നലെ വൈകിട്ട് അഹമ്മദാബാദിലെ തങ്ങളുടെ ഓഫീസുകളിൽ പരിശോധന നടത്തിയെന്നും എന്നാൽ ഒന്നും കണ്ടെത്തിയില്ലെന്നും ആം ആദ്മി പാർട്ടി. അതേസസമയം റെയ്ഡ് നടത്തിയിട്ടില്ലെന്ന് അഹമ്മദാബാദ് പോലീസ് വ്യക്തമാക്കി. വീണ്ടും വരുമെന്ന് പോലീസ് പ്രത്യക്ഷത്തിൽ പറഞ്ഞതായി പാർട്ടിയുടെ ഗുജറാത്ത് നേതാവ് ഇസുദൻ ഗാധ്വി ട്വീറ്റ് ചെയ്തു. ആം ആദ്മിക്ക് ലഭിക്കുന്ന ജനപിന്തുണ ബി.ജെ.പിയെ ഞെട്ടിച്ചിരിക്കുകയാണ്, രണ്ട് ദിവസത്തെ ഗുജറാത്ത് പര്യടനത്തിനായി അഹമ്മദാബാദിലെത്തിയ കെജ്രിവാൾ പറഞ്ഞു.
'കെജ്രിവാൾ അഹമ്മദാബാദിലെത്തിയ ഉടൻ ഗുജറാത്ത് പോലീസ് ആം ആദ്മി പാർട്ടിയുടെ അഹമ്മദാബാദ് ഓഫീസിൽ റെയ്ഡ് നടത്തി. രണ്ട് മണിക്കൂർ തിരഞ്ഞു. ഒന്നും കണ്ടെത്തിയില്ല. അവർ വീണ്ടും വരുമെന്ന് പറഞ്ഞു,' ഇസുദൻ ഗാധ്വി ട്വീറ്റ് ചെയ്തു.
'ഗുജറാത്തിലെ ജനങ്ങളിൽ നിന്ന് ലഭിക്കുന്ന അപാരമായ പിന്തുണ ബി.ജെ.പിയെ ഭയപ്പെടുത്തുന്നു. ആം ആദ്മി പാർട്ടിക്ക് അനുകൂലമായി ഗുജറാത്തിൽ കൊടുങ്കാറ്റ് വീശുകയാണ്. ദൽഹിക്ക് ശേഷം ഇപ്പോൾ ഗുജറാത്തിലും റെയ്ഡ് തുടങ്ങി. ദൽഹിയിൽ ഒന്നും കണ്ടെത്തിയില്ല, ഗുജറാത്തിൽ ഒന്നും കണ്ടെത്തിയില്ല. ഞങ്ങൾ സത്യസന്ധരും ദേശസ്നേഹികളുമായ ആളുകളാണ്,'' കെജ്രിവാൾ ട്വീറ്റ് ചെയ്തു. അതേസമയം, 'ആം ആദ്മി പാർട്ടി ഓഫീസ് പോലീസ് റെയ്ഡ് ചെയ്തുവെന്ന വാർത്ത സോഷ്യൽ മീഡിയയിലൂടെയാണ് പുറത്തുവന്നതെന്നും സിറ്റി പോലീസ് അത്തരം റെയ്ഡുകൾ നടത്തിയിട്ടില്ലെന്നും അഹമ്മദാബാദ് പോലീസ് ട്വീറ്റ് ചെയ്തു.
