അഹമ്മദാബാദ്- വോട്ട് ബാങ്ക് രാഷ്ട്രീയം വിദേശനയത്തില്‍ സ്വാധീനം ചെലുത്തിയിരുന്ന കാലം അവസാനിച്ചുവെന്നും ഇന്ത്യയുടെ ഇസ്രായേല്‍ ബന്ധം അതാണ് കാണിക്കുന്നതെന്നും വിദേശകാര്യ മന്ത്രി എസ്. ജയശങ്കര്‍.
ചില രാഷ്ട്രീയ കാരണങ്ങളാല്‍ ഇസ്രായേലുമായുള്ള ബന്ധം മെച്ചപ്പെടുത്തുന്നതില്‍ ഇന്ത്യക്ക് സ്വയം നിയന്ത്രിക്കേണ്ടി വന്നിരുന്നു. എന്നാല്‍ ഇസ്രയേലിലേക്ക് പോയ ആദ്യ ഇന്ത്യന്‍ പ്രധാനമന്ത്രിയാണ് നരേന്ദ്ര മോഡി. വോട്ട് ബാങ്ക് രാഷ്ട്രീയത്തിന് വേണ്ടി ദേശീയ താല്‍പര്യം മാറ്റിവെച്ച കാലം കഴിഞ്ഞു- ജയശങ്കര്‍ പറഞ്ഞു.
തന്റെ പുസ്തകമായ ദി ഇന്ത്യ വേ: സ്ട്രാറ്റജീസ് ഫോര്‍ എ അണ്‍സെര്‍റ്റൈന്‍ വേള്‍ഡിന്റെ ഗുജറാത്തി വിവര്‍ത്തനം പ്രകാശനം ചെയ്യുന്നതിനിടെയാണ് ജയശങ്കര്‍ ഇന്ത്യയുടെ വിദേശനയം വിശദീകരിച്ചത്.
ഇന്ത്യയുടെ വാട്ടര്‍ മാനേജ്‌മെന്റ് മേഖലയിലെ പുരോഗതിക്കായി ഇസ്രായേലിലെ മികച്ച രീതികളും സാങ്കേതികവിദ്യകളും പങ്കിടാന്‍ സഹായിക്കുന്നതിന് ഇസ്രയേലിന് വാട്ടര്‍ അറ്റാച്ച് സ്ഥാനം ഉള്ള ഏക രാജ്യമാണ് ഇന്ത്യ.
ഇന്ത്യയുടെ സ്വതന്ത്ര വിദേശനയം പ്രധാനമന്ത്രി നരേന്ദ്ര മോഡിയുടെ കീഴില്‍ രൂപാന്തരപ്പെട്ടുവെന്ന് അദ്ദേഹം പറഞ്ഞു. നരേന്ദ്ര മോഡി സര്‍ക്കാരിന്റെ വിദേശകാര്യ മന്ത്രിയാകുക എന്നത് ഒരു വലിയ ശക്തിയാണെന്നും ജയശങ്കര്‍ കൂട്ടിച്ചേര്‍ത്തു.
വിദ്യാഭ്യാസം, സാമൂഹിക അവബോധം, സമൃദ്ധി എന്നിവ കാരണം രാജ്യത്ത് ജനസംഖ്യ കുറയുന്നുണ്ടെന്ന് അദ്ദേഹം പറഞ്ഞു.
ഇന്ത്യന്‍ ജനസംഖ്യയുടെ വളര്‍ച്ചാ നിരക്ക് ഇപ്പോള്‍ കുറയുന്നുണ്ട്. ഇതിനുള്ള കാരണങ്ങള്‍ വിദ്യാഭ്യാസം, സാമൂഹിക അവബോധം, സമൃദ്ധി എന്നിവയാണ്. കാലക്രമേണ നമ്മള്‍ ഓരോരുത്തരുടെയും കുടുംബത്തിന്റെ വലിപ്പം ചെറുതാകും.
വിവിധ മരണനിരക്ക് സൂചകങ്ങളിലും പുരോഗതി ഉണ്ടായിട്ടുണ്ട്. ജീവിത നിലവാരം മെച്ചപ്പെടുത്തുന്നതിനും നൈപുണ്യവും പരിശീലനവും നല്‍കുന്നതിലും തൊഴിലവസരങ്ങള്‍ സൃഷ്ടിക്കുന്നതിലും ജനസംഖ്യാപരമായ ചില തടസ്സങ്ങളുണ്ട്. എന്നാല്‍ നിര്‍ബന്ധിത ജനസംഖ്യാ നിയന്ത്രണം വളരെ അപകടകരമായ പ്രത്യാഘാതങ്ങള്‍ ഉണ്ടാക്കുമെന്നും അത് ലിംഗ അസന്തുലിതാവസ്ഥ സൃഷ്ടിക്കുമെന്നും ജയശങ്കര്‍ പറഞ്ഞു.
