അബുദാബി- പതിനൊന്ന് വയസ്സുകാരനെ ലൈംഗികമായി പീഡിപ്പിച്ച ശേഷം കഴുത്ത് ഞെരിച്ചു കൊലപ്പെടുത്തിയ കേസില്‍ പ്രതിയായ പാക്കിസ്ഥാന്‍ പൗരന് അബുദബി കോടതി വധശിക്ഷ വിധിച്ചു. നേരത്തെ കീഴ്ക്കോടതി വിധിച്ച ശിക്ഷ ചൊവ്വാഴ്ച അബുദബി അപ്പീല്‍ കോടതി ശരിവെക്കുകയായിരുന്നു.
33-കാരനായ പ്രതിക്കെതിരെ ചുമത്തിയ കൊലപാതകം, ബലാത്സംഗം എന്നീ കുറ്റങ്ങള്‍ നേരത്തെ തെളിയിക്കപ്പെട്ടിരുന്നു. കൊല്ലപ്പെട്ട പാക് ബാലന്റെ ബന്ധുക്കള്‍ക്ക് നഷ്ടപരിഹാരമായി രണ്ടു ലക്ഷം ദിര്‍ഹം പ്രതി നല്‍കണമെന്നും കോടതി ഉത്തരവിട്ടു. പ്രതിക്കു മേല്‍ ചുമത്തിയ എല്ലാ കുറ്റങ്ങളും തെളിയിക്കപ്പെട്ടിരിക്കുന്നുവെന്നും കീഴ്ക്കോടതി വിധിച്ച ശിക്ഷ ശരിവെക്കുന്നുവെന്നും അപ്പീല്‍ കോടതി ജഡ്ജി വ്യക്തമാക്കി. ശിക്ഷ ശരിവച്ചതോടെ ഇയാള്‍ക്ക് താമസിയാതെ വധശിക്ഷ നടപ്പാക്കും.
കഴിഞ്ഞ വര്‍ഷം ജൂണ്‍ ഒന്നിനാണ് കേസിനാസ്പദമായ സംഭവം. അബുദബിയിലെ ഒരു കെട്ടിടത്തിനു മുകളില്‍ വെച്ചാണ് ബാലനെ പ്രതി കൊലപ്പെടുത്തിയത്. പളളിയില്‍ പോകാനായി വീട്ടില്‍ നിന്നിറങ്ങിയ ബാലനെ കാണാതാകുകയായിരുന്നു. തൊട്ടടുത്ത ദിവസമാണ് മുറൂര്‍ റോഡിലെ കെട്ടിടത്തിനു മുകളില്‍നിന്ന് മൃതദേഹം ലഭിച്ചത്. ഈ കെട്ടിടത്തിലാണ് ബാലന്‍ പിതാവിനോും വളര്‍ത്തമ്മയോടുമൊപ്പം കഴിഞ്ഞിരുന്നത്.
കുട്ടിയുടെ ബന്ധു കൂടിയായ പ്രതി പീഡിപ്പിച്ച ശേഷം കയര്‍ കഴുത്തില്‍ കുരുക്കി ശ്വാസം മുട്ടിച്ചാണ് കൊലനടത്തിയതെന്നും അന്വേഷണത്തില്‍ തെളിഞ്ഞിരുന്നു. പെണ്‍വേഷം കെട്ടിയാണ് പ്രതി കുട്ടിയെ തന്ത്രപൂര്‍വം കെട്ടിടത്തിനു മുകളിലെത്തിച്ചതെന്നും പോലീസ് കണ്ടെത്തിയിരുന്നു.
