കൊച്ചി- നടിയെ ബലാത്സംഗം ചെയ്ത കേസില് നടനും നിര്മ്മാതാവുമായ വിജയ് ബാബുവിന് ഹൈക്കോടതി മുന്കൂര്ജാമ്യം അനുവദിച്ചു. അന്വേഷണ ഉദ്യോഗസ്ഥന് മുന്നില് കീഴടങ്ങണമെന്ന് ഹൈക്കോടതി വ്യക്തമാക്കി. സര്ക്കാരിനു വേണ്ടി പ്രോസിക്യൂഷന് അഡീഷനല് ഡയറക്ടര് ജനറല് ഗ്രേഷ്യസ് കുര്യാക്കോസ് ഹാജരായി. രഹസ്യമായാണു ബലാംത്സംഗക്കേസിലെ നടപടി ക്രമങ്ങള് നടത്തിയത്.
മാര്ച്ച് 16നും 22 നുമായി വിജയ് ബാബു പീഡിപ്പിച്ചെന്നാരോപിച്ചാണു നടി പൊലീസില് പരാതി നല്കിയത്. എന്നാല് തന്റെ പുതിയ സിനിമയില് മറ്റൊരു നടിയെ നായികയായി നിശ്ചയിച്ചതോടെയാണ് ഇവര് പീഡനപ്പരാതി നല്കിയതെന്നാണ് വിജയ് ബാബുവിന്റെ വാദം. പരാതിക്കാരിയായ നടിയുമായി ഉഭയകക്ഷി സമ്മതപ്രകാരമുള്ള ബന്ധമാണെന്ന മൊഴിയാണ് വിജയ് ബാബു ആവര്ത്തിച്ചത്. 40 പേരുടെ മൊഴികള് അന്വേഷണ സംഘം രേഖപ്പെടുത്തി. നേരത്തേ, പരാതിക്കാരിയുടെ പേര് വെളിപ്പെടുത്തിയതിനു റജിസ്റ്റര് ചെയ്ത കേസില് വിജയ് ബാബുവിന്റെ മുന്കൂര് ജാമ്യാപേക്ഷ ഹൈക്കോടതി തള്ളിയിരുന്നു. ജാമ്യം ലഭിക്കാവുന്ന വകുപ്പുകള് പ്രകാരമാണു കേസെടുത്തിരിക്കുന്നതെന്നു വിലയിരുത്തിയാണു ജസ്റ്റിസ് ബെച്ചു കുര്യന് തോമസ് ഹര്ജി തള്ളിയത്.
