അബുദാബി- നഗരത്തിലെ മലയാളി ഹോട്ടലില് ഗ്യാസ് സിലിണ്ടര് പൊട്ടിത്തെറിച്ച് രണ്ട് പേര് മരിച്ചു. 120 ഓളം പേര്ക്ക് പരിക്കേറ്റു. ഇതില് 64 പേരുടെ നില ഗുരുതരമാണ്. ഖാലിദിയയിലെ ഫുഡ് കെയര് റെസ്റ്റാറന്റിലാണ് സ്ഫോടനം. തൊട്ടടുത്ത കടകളിലേക്കും തീപടര്ന്നു. മരിച്ചവരെയും പരിക്കേറ്റവരെയും കുറിച്ചുള്ള വിവരങ്ങള് പോലീസ് പുറത്തുവിട്ടിട്ടില്ല. മലയാളികള് ഉള്പ്പെടെയുള്ളവര്ക്ക് പരിക്കേറ്റിട്ടുണ്ടെന്നായിരുന്നു പ്രാഥമിക വിവരം. എന്നാല് ഇക്കാര്യത്തില് സ്ഥിരീകരണമില്ല.
വന് ശബ്ദത്തോടെയുണ്ടായ അപകടത്തില് സമീപ ഷോപ്പുകളുകളിലെയും ഫ്ളാറ്റുകളിലെയും ഗ്ലാസുകളും മറ്റും പൊട്ടിത്തെറിച്ചു. സമീപത്ത് പാര്ക്ക് ചെയ്തിരുന്ന വാഹനങ്ങള്ക്കും കേടുപാടുണ്ട്. ഉച്ചയ്ക്ക് 1.35ഓടെയായിരുന്നു സംഭവം. സ്ഫോടനത്തെ തുടര്ന്ന് വലിയ ശബ്ദം കേട്ടതായും ജനാലകള് കുലുങ്ങിയതായും സമീപ കെട്ടിടങ്ങളിലെ താമസക്കാര് പറഞ്ഞു. ആദ്യം ചെറിയൊരു ശബ്ദവും പിന്നീട് വലിയ ശബ്ദവും തങ്ങള് കേട്ടെന്ന് സമീപവാസികള് വെളിപ്പെടുത്തി.
സമീപത്തെ നാലു താമസകേന്ദ്രങ്ങളില്നിന്ന് ജനങ്ങളെ മുന്കരുതലെന്ന നിലക്ക് അധികൃതര് ഒഴിപ്പിക്കുകയും ചെയ്തു. റസ്റ്റോറന്റില് പാചകവാതക സിലിണ്ടര് പൊട്ടിത്തെറിക്കുകയായിരുന്നുവെന്നും സിവില് ഡിഫന്സ് എത്തി തീയണച്ചുവെന്നും അബുദാബി പോലീസ് പ്രസ്താവനയില് അറിയിച്ചു.
