തിരുവനന്തപുരം- സംസ്ഥാനത്ത് ഇന്നും അതിതീവ്ര മഴക്ക് സാധ്യത. അടുത്ത മൂന്ന് മണിക്കൂറില് എല്ലാ ജില്ലകളിലും ഒറ്റപ്പെട്ട മഴക്ക് സാദ്ധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് അറിയിച്ചു. നാല് ജില്ലകളില് ഓറഞ്ച് അലര്ട്ട് പ്രഖ്യാപിച്ചു. മലപ്പുറം, കോഴിക്കോട്, കണ്ണൂര്, കാസര്കോട് ജില്ലകളിലാണ് ഓറഞ്ച് അലര്ട്ട്.
തിരുവനന്തപുരം, കൊല്ലം, പത്തനംതിട്ട, കോട്ടയം, ആലപ്പുഴ, തൃശൂര്, എറണാകുളം, ഇടുക്കി, പാലക്കാട്, വയനാട് ജില്ലകളില് യെല്ലോ അലര്ട്ട് പ്രഖ്യാപിച്ചിട്ടുണ്ട്. മത്സ്യത്തൊഴിലാളികള് കടലില് പോകരുതെന്ന് അധികൃതര് നിര്ദേശം നല്കി.
അറബിക്കടലിലെയും ബംഗാള് ഉള്ക്കടലിലെയും ചക്രവാതച്ചുഴികളും ഇതിന്റെ സ്വാധീനഫലമായുള്ള അതിശക്തമായ പടിഞ്ഞാറന് കാറ്റുമാണ് കനത്ത മഴയ്ക്ക് കാരണം. സംസ്ഥാനത്ത് ശനിയാഴ്ച വരെ കനത്ത മഴ തുടരുമെന്ന് അധികൃതര് മുന്നറിയിപ്പ് നല്കി. നാളെ തൃശൂര് മുതല് കാസര്കോട് വരെയുള്ള ജില്ലകളില് ഓറഞ്ച് അലര്ട്ട് പ്രഖ്യാപിച്ചു.
