രാജ്കോട്ട്- മറ്റൊരു സ്ത്രീയുമായി ബന്ധമുണ്ടെന്ന സംശയത്തില് രാജ്കോട്ടില് 49 കാരനെ തലയ്ക്കടിച്ച് കൊലപ്പെടുത്തി മൃതദേഹം കത്തിച്ചു. ഒപ്പംതാമസിച്ചിരുന്ന യുവതി അറസ്റ്റില്. രാജ്കോട്ട് മാരുതി നഗര് സ്വദേശി രാകേഷ് അഥിയാരുവിന്റെ കൊലപാതകത്തിലാണ് ഒപ്പംതാമസിച്ചിരുന്ന ആശ ചൗഹാനെ അറസ്റ്റ് ചെയ്തത്. കൃത്യത്തില് പങ്കുണ്ടെന്ന സംശയത്തില് രാകേഷിന്റെ ഇളയമകനെയും പോലീസ് കസ്റ്റഡിയിലെടുത്തിട്ടുണ്ട്. ഇയാളെ ചോദ്യംചെയ്തുവരികയാണെന്ന് പോലീസ് പറഞ്ഞു.
ഭാരമേറിയ വസ്തു കൊണ്ടാണ് രാകേഷിന്റെ തലയ്ക്കടിച്ചത്. മരണം ഉറപ്പാക്കിയതോടെ മൃതദേഹം വീട്ടിനുള്ളിലിട്ട് കത്തിക്കുകയായിരുന്നു.
15 വര്ഷം മുമ്പ് ഭാര്യയുമായി വേര്പിരിഞ്ഞശേഷം ആശയോടൊപ്പമാണ് രാകേഷ് താമസിച്ചിരുന്നത്. ഇവരുടെ വീടിന് തൊട്ടടുത്തായി രാകേഷിന്റെ ബന്ധുക്കളും താമസിക്കുന്നുണ്ട്.
രാകേഷിന്റെ വീട്ടില്നിന്ന് പുക ഉയരുന്നത് കണ്ടാണ് അയല്ക്കാര് വിവരമറിയുന്നത്. ഉടന്തന്നെ ഇവര് രാകേഷിന്റെ സഹോദരന് ശൈലേഷിനെ വിവരമറിയിച്ചു. വീട്ടിലെത്തിയപ്പോള് പാതി കത്തിക്കരിഞ്ഞനിലയിലാണ് സഹോദരന്റെ മൃതദേഹം കണ്ടതെന്നാണ് ഇയാളുടെ മൊഴി. മുറിയിലാകെ മണ്ണെണ്ണയുടെ ഗന്ധവും ഉണ്ടായിരുന്നു. സംഭവത്തില് ആശയെ സംശയിക്കുന്നതായും ഇയാള് പോലീസിനോട് പറഞ്ഞിരുന്നു.
അടുത്തിടെയായി രാകേഷ് പതിവായി വഴക്കിട്ടിരുന്നതായും ഇയാള്ക്ക് മറ്റൊരു സ്ത്രീയുമായി ബന്ധമുണ്ടെന്ന് താന് സംശയിച്ചിരുന്നതായും ആശ പോലീസിനോട് പറഞ്ഞു.
