കൊച്ചി- വധ ഗൂഢാലോചന കേസിലെ എഫ്.ഐ.ആര് റദ്ദാക്കണമെന്ന് ആവശ്യപ്പെട്ട് ദിലീപ് സമര്പ്പിച്ച ഹരജിയില് ഹൈക്കോടതി ചൊവ്വാഴ്ച വിധി പറയും. ഉച്ചക്ക് 1.45-ന് ജസ്റ്റിസ് സിയാദ് റഹ്മാനാണ് വിധി പറയുക. കേസ് റദ്ദാക്കണമെന്നും അല്ലെങ്കില് സി.ബി.ഐക്ക് വിടണമെന്നുമാണ് ദിലീപിന്റെ ആവശ്യം.
വധ ഗൂഢാലോചന കേസില് മുന്കൂര് ജാമ്യം ലഭിച്ചതിന് പിന്നാലെയാണ് കേസ് റദ്ദാക്കണമെന്ന് ആവശ്യപ്പെട്ട് ദിലീപ് ഹൈക്കോടതിയെ സമീപിച്ചത്. എന്നാല് പ്രോസിക്യൂഷന് ഈ ആവശ്യത്തെ ശക്തമായി എതിര്ത്തു. തുടര്ന്ന് ദിലീപിനെതിരായ വിവിധ ശബ്ദരേഖകളും ഫൊറന്സിക് റിപ്പോര്ട്ടുകളും ക്രൈംബ്രാഞ്ച് കോടതിയില് ഹാജരാക്കുകയും ചെയ്തിരുന്നു.
അതേസമയം, കേസ് റദ്ദാക്കിയില്ലെങ്കില് സി.ബി.ഐക്ക് വിടണമെന്ന ശക്തമായ വാദമാണ് പ്രതിഭാഗം കോടതിയില് ഉയര്ത്തിയത്. കേസ് സി.ബി.ഐക്ക് വിടാനുള്ള സാധ്യത മുന്നില്ക്കണ്ട് അന്വേഷണസംഘം ആലുവ മജിസ്ട്രേറ്റ് കോടതിയില് അന്വേഷണ പുരോഗതി റിപ്പോര്ട്ടും സമര്പ്പിച്ചിരുന്നു.
