ദുബായ്- അറ്റകുറ്റ പണികള്‍ക്കായി ദുബായ് വിമാനത്താവളത്തിലെ റണ്‍വേ ഭാഗികമായി അടയ്ക്കുന്നതിനാല്‍ ഇന്ത്യന്‍ വിമാന സര്‍വീസുകള്‍ മറ്റു വിമാനത്താവളങ്ങളിലേക്ക് മാറ്റുന്നതിന്റെ കൂടുതല്‍ വിവരങ്ങള്‍ അധികൃതര്‍ വെളിപ്പെടുത്തി. അടുത്ത മാസം 9 മുതല്‍ 45 ദിവസത്തേക്കു നിര്‍മാണ പ്രവര്‍ത്തനം നടക്കുമ്പോള്‍ 40 ശതമാനം വിമാന സര്‍വീസുകളാണ് മറ്റു വിമാനത്താവളങ്ങളിലേയ്ക്ക് മാറ്റുക.
ഇന്‍ഡിഗോയുടെ 15 സര്‍വീസുകളില്‍ 8 സര്‍വീസുകള്‍ പഴയ വിമാനത്താവളത്തില്‍ നിന്നും 7 സര്‍വ്വീസുകള്‍ ജബല്‍ അലിയിലുള്ള ദുബായ് വേള്‍ഡ് സെന്ററല്‍ വിമാനത്താവളത്തില്‍ നിന്നുമായിരിക്കും. എയര്‍ ഇന്ത്യ ഭാഗികമായി ഷാര്‍ജയില്‍ നിന്നും ജബല്‍ അലിയില്‍ നിന്നും സര്‍വീസ് നടത്തുമെന്ന് എയര്‍ ഇന്ത്യ റീജണല്‍ മാനേജര്‍ പി.പി. സിംഗ് പറഞ്ഞു.
തങ്ങളുടെ സര്‍വീസ് പഴയ ടെര്‍മിനലില്‍ നിന്നു തന്നെ ആയിരിക്കുമെന്നു വിസ്താര അധികൃതര്‍ പറഞ്ഞു. സ്പൈസ് ജെറ്റ് അധികൃതര്‍ ഇക്കാര്യത്തെക്കുറിച്ച് കൂടുതല്‍ അറിയില്ലെന്നാണ് അറിയിച്ചത്. എമിറേറ്റ്സ് ഇപ്പോഴുള്ള ടെര്‍മിനലില്‍ തന്നെയായിരിക്കും.
