ബംഗളൂരു- കര്ണാടകയില് വിദ്യാഭ്യാസ സ്ഥാപനങ്ങളില് ഹിജാബ് നിരോധിച്ച് കൊണ്ടുള്ള നടപടി ശരിവെച്ച ഹൈക്കോടതി വിധിക്കെതിരെ സുപ്രീംകോടതിയില് അപ്പീല് നല്കാനൊരുങ്ങി വിദ്യാര്ഥിനികള്. അതിനിടെ ഹൈക്കോടതി വിധിയെ കേന്ദ്രസര്ക്കാര് സ്വാഗതം ചെയ്തു. ഹൈക്കോടതി ഉത്തരവ് അംഗീകരിച്ച് സമാധാനം നിലനിര്ത്താന് എല്ലാവരും തയ്യാറാവണമെന്ന് കേന്ദ്രമന്ത്രി പ്രഹ്ലാദ് ജോഷി പറഞ്ഞു.
പഠിക്കുക എന്നതാണ് വിദ്യാര്ഥികളെ സംബന്ധിച്ച് അടിസ്ഥാന കാര്യമെന്നും മറ്റുകാര്യങ്ങളെല്ലാം ഉപേക്ഷിച്ച് പഠനത്തില് ശ്രദ്ധ കേന്ദ്രീകരിച്ച് ഒന്നിച്ച് മുന്നേറാന് തയാറാകണമെന്ന് അദ്ദേഹം അഭ്യര്ഥിച്ചു.
ഭരണഘടനയുടെ 25ാം അനുച്ഛേദത്തിന്റെ വ്യാഖാനത്തില് വലിയ മാറ്റങ്ങള്ക്ക് കാരണമാകുന്നതാണ് കോടതി വിധിയെന്ന് കര്ണാടക അറ്റോര്ണി ജനറല് പ്രബുലിംഗ് നവദ്കി പറഞ്ഞു. വ്യക്തി താല്പര്യത്തിന് അപ്പുറം സ്ഥാപനത്തിന്റെ അച്ചടക്കത്തിന് പ്രാധാന്യം നല്കുന്നതാണ് വിധിയെന്നും അദ്ദേഹം പറഞ്ഞു.
ഹിജാബ് ഇസ്ലാമിലെ അനിവാര്യ ആചാരമല്ലെന്ന് വിലയിരുത്തിയാണ് ചീഫ് ജസ്റ്റിസ് ഋതു രാജ് അവസ്തിയുടെ നേതൃത്വത്തിലുള്ള വിശാല ബെഞ്ച് ഹരജികള് തള്ളിയത്. ഹിജാബ് ധരിക്കുക എന്നത് മൗലികാവാകാശങ്ങളുടെ ഭാഗമാണെന്ന് ചൂണ്ടിക്കാട്ടിയായിരുന്നു വിദ്യാര്ഥിനികളുടെ ഹരജി. ഹിജാബിന് ഭരണഘടനയുടെ 25ാം അനുച്ഛേദം അനുസരിച്ചുള്ള സംരക്ഷണം ലഭിക്കില്ലെന്ന് വ്യക്തമാക്കിയ കോടതി വിദ്യാലയങ്ങളില് യൂണിഫോം നിര്ബന്ധമാക്കുന്നത് മൗലികവകാശ ലംഘനമല്ലെന്നും ചൂണ്ടിക്കാട്ടി. വിദ്യാഭ്യാസ സ്ഥാപനങ്ങളില് ഹിജാബ് നിരോധിച്ച് കൊണ്ട് ഫെബ്രുവരി അഞ്ചിന് സംസ്ഥാന സര്ക്കാര് പുറത്തിറക്കിയ ഉത്തരവാണ് കോടതി ശരിവെച്ചത്.
