ജയ്പൂര്-രാജസ്ഥാനില് ജോലി ചെയ്യുന്ന സ്ഥാപനത്തിന്റെ ഗോഡൗണില്നിന്ന് 590 എല്ഇഡി ടിവികള് മോഷ്ടിച്ച് കടത്തിയ സംഭവത്തില് വെയര്ഹൗസ് മാനേജര് അറസ്റ്റില്. നാഗൗര് സ്വദേശി 39 കാരന് ദിനേശ് ചിറ്റ്ലംഗിയയാണ് അറസ്റ്റിലായത്.
ഗോഡൗണില് നിന്ന് 590 എല്ഇഡി ടിവികള് മോഷണം പോയതായി ഉടമ കമല് തോഷ്നിവാള് പരാതി നല്കുകയായിരുന്നു. തുടര്ന്ന് കമ്പനിയുടെ ബില്ലിംഗ് സംവിധാനം പരിശോധിച്ചപ്പോള് എസ്എസ് ഇലക്ട്രോണിക്സിന്റെ പേരില് രണ്ട് ഇ-വേ ബില്ലുകള് കണ്ടെത്തി.
കമ്പനിയുടെ മാനേജര് ഈ രണ്ട് ബില്ലുകള് നല്കുകയും രണ്ട് ട്രക്കുകളിലായി 590 എല്ഇഡി ടിവികള് അജ്ഞാത സ്ഥലത്തേക്ക് കൊണ്ടുപോകുകയും ചെയ്തതായും തുടര്ന്നുള്ള അന്വേഷണത്തില് കണ്ടെത്തി.
മോഷ്ടിച്ച ടിവികളെല്ലാം വസന്ത് കുഞ്ച് എന്ക്ലേവിലെ വാടക സ്ഥലത്ത് നിന്ന് കണ്ടെടുത്തിട്ടുണ്ടെന്ന് പോലീസ് ഉദ്യോഗസ്ഥര് പറഞ്ഞു. ചോദ്യം ചെയ്യലില്, തന്റെ പേരില് നാഗൗറില് എസ്എസ് ഇലക്ട്രോണിക്സ് എന്ന കട നടത്തുന്നുണ്ടെന്ന് ദിനേശ് വെളിപ്പെടുത്തി. സിസിടിവി ദൃശ്യങ്ങള് പരിശോധിച്ചാണ് പോലീസ് എല്ഇഡി ടിവികള് അടങ്ങിയ ട്രക്കുകള് കണ്ടെത്തിയത്.
