ബുറൈദ- ബുറൈദയിൽ രണ്ടു മാസം മുമ്പ് ഹൃദയാഘാതത്തെ തുടർന്ന് നിര്യാതയായ തൃശൂർ അഞ്ചേരി ജി റ്റി നഗറിൽ മൂലൻസ് ഹൗസിൽ ഷീബ വർഗീസിന്റെ(46) മൃതദേഹം വെളളിയാഴ്ച പുലർച്ചെ മൂന്നുമണിക്ക് എമിറേറ്റ്‌സ് എയർലൈനിൽ നെടുമ്പാശ്ശേരിയിലെത്തും.വർഗീസിന്റെ ഭാര്യയായ ഷീബ ബുറൈദയിലെ കിം ഗ് ഫഹദ് സ്‌പെഷലിസ്റ്റ് ആശുപത്രിയിലാണ് മരിച്ചത്. ആറു വർഷമായി സമാമ കോൺട്രാക്റ്റിംഗ് കമ്പനിയിലെ ജീവനക്കാരിയായിരുന്നു. വിനീഷ്, വിനയ എന്നിവർ മക്കളാണ്. ഇന്ത്യൻ എംബസിയുടെ സഹായത്തോടെ സാമൂഹിക പ്രവർത്തകർ പോലീസിൽ പരാതി നൽകിയാണ് മൃതദേഹം നാട്ടിലെത്തിക്കാനുള്ള നീക്കം വിജയിപ്പിച്ചത്.
ബുറൈദയിലെ സാമൂഹിക പ്രവർത്തകൻ സലാം പറാട്ടി റിയാദ് ന്യൂഏജ് ഇന്ത്യ സാംസ്‌കാരിക വേദിയുടെ ജീവകാരുണ്യ വിഭാഗം കൺവീനർ എം. സാലി ആലുവ, മിഥുൻ എന്നിവരുടെ നേതൃത്വത്തിലാണ് നടപടിക്രമങ്ങൾ പൂർത്തീകരിച്ചത്.കേരള പ്രവാസി ഫെഡറേഷൻ സംസ്ഥാന ജനറൽ സെക്രട്ടറി പി.പി.സുനീറാണ് ഈ വിഷയം സാമുഹിക പ്രവർത്തകരുടെ ശ്രദ്ധയിൽപ്പെടുത്തിയത്.
